மெமெரிஸ்- விமர்சனம்

டைட்டிலைப் பார்த்ததும் எதோ நமது பழைய நினைவுகளை கிளறி விடும் படம் என நினைத்தால்…அந்த நினைப்பிற்கு ஒரு புல்ஸ்டாப் வைக்கவும். இது பக்கா சைக்காலஜிக்கள் திரில்லர். ஒரு மனிதனுக்குள் இருக்கும் நினைவுகளை அறிவியல்& மருத்துவம் மூலமாக அழித்து, வேறு பல புதிய நினைவுகளை வைக்க முடியும் என்ற அதிர்ச்சி கான்செப்ட்டை மையக்கருவாக வைத்துப் பேசியிருக்கிறது மெமெரிஸ்

கதை?

ஒரு டிவி சோ மூலமாக ஒருவனது வாழ்க்கையை நாயகன் வெற்றி சொல்கிறார். அந்தக் கதையில் வருபவரும் வெற்றி. அந்தக் கதையில் வெற்றி நான்கு கொலைகளை செய்கிறார். அவர் செய்த கொலைகளுக்கான காரணம் என்ன? உண்மையில் அந்தக் கொலைகளை அவர் தான் செய்தாரா? இல்லை அறிவியல் நிறைந்த மருத்துவம் அவர் நினைவில் அந்தக் கொலைகளை அவர் செய்ததாக புகுத்தி விட்டதா? என்ற கேள்விகளுக்கு பதிலளிக்கிறது மீதிப்படம்

வெற்றி நடிகராக அறியப்பட்டாலும் இந்தப்படத்தில் நல்ல நடிகராக அறியப்பட பெரும் முயற்சி எடுத்திருக்கிறார். அபிநவ் ராமானுஜம் கெட்டப்பில் அவரது நடிப்பு நன்றாக எடுபட்டுள்ளது. ஹரிஸ் பேரடி தனது நடிப்பில் வழமை போல அருமை செய்திருக்கிறார். நாயகிக்கு பெரிய வேலை எதுவும் படத்தில் இல்லை.

திரில்லர் படங்கள் என்றால் இசை மூலம் தான் படத்தின் காட்சிகளை அதன் அதிர்வுத்தன்மையோடு கடத்த முடியும். அதை உணர்ந்து இசை அமைத்துள்ளார் கவாஸ்கர் அவினாஸ். படத்தின் ஒளிப்பதிவில் நல்ல சிரத்தை எடுத்து லைட்டிங் அமைத்துள்ளார் கேமராமேன்.

மனித நினைவுகளை மாற்றி வைத்து அதன்மூலம் மிகப்பெரிய குற்றச்செயல்கள் செய்ய முடியும் என யோசித்து ஒரு அட்டகாசமான லைனைப் பிடித்துள்ளார்கள் இயக்குநர்கள் ப்ரவீன் ஷ்யாம். ஒரு தேர்ந்த ஆங்கிலப்படம் ரேஞ்சில் கதை யோசித்த அவர்கள், நம் இந்தியச் சினிமா ரசிகனின் உளநிலை அறிந்து எமோஷ்னல் கனெக்டிங்கோடு திரைக்கதை அமைத்திருந்தால் நம் மெமெரிஸில் அழிக்க முடியாத படமாக இது அமைந்திருக்கும். இவ்வளவு கஷ்டப்பட்டு ஒரு படத்தைப் புரிஞ்சிக்கணுமா என்ற அளவில் சற்றுத் திணற வைக்கும் திரைக்கதை தான் படத்திற்கு வில்லன். ஆனாலும் இந்த வித்தியாசமான முயற்சிக்காக படத்தை ஒருமுறை சிரத்தை எடுத்தேனும் பார்க்கலாம்
3/5
-மு.ஜெகன் கவிராஜ்