வாழ்வு தொடங்குமிடம் நீதானே- விமர்சனம்

தன் பாலின ஈர்ப்பு என்பது வலிந்து திணிக்கப்பட்ட வாழ்க்கை முறை அல்ல..அது இயல்பான ஒன்று என்பதைப் சிறு சிறு சமரசங்களோடு பேசுகிறது வாழ்வு துவங்குமிடம் நீதானே.

இஸ்லாமிய மார்க்கத்தை தீவிரமாக கடைபிடிக்கும் ஒருவர். அவரின் மகள் நிரஞ்சனாவிற்கு ஸ்ருதி மேல் ஈர்ப்பு வருகிறது. ஸ்ருதியும் அந்த இஸ்லாமிய நிரஞ்சனாவும் காதல் வயப்படுகிறார்கள். இரு பெண்கள் காதலிக்கிறார்கள் என்பதை மார்க்கத்தைத் தீவிரமாக கடைபிடிக்கும் மனிதர்கள் எப்படி ஏற்றுக்கொள்வார்கள்? பெரும் பிரச்சினை வெடிக்கிறது. முடிவில் இரு பெண்களின் தன்பாலின காதல் என்னானது? என்பதே படத்தின் மீதி திரைக்கதை

நடிப்பில் நிரஞ்சனா ஸ்ருதி இருவருமே நன்றாக நடித்துள்ளனர். கண்களாலும் உதடு துடிப்பாலும் கூட ஸ்கோர் செய்கிறார் நிரஞ்சனா. உடல்மொழி மற்றும் ஆட்டிட்யூட் ஆகிவற்றில் மாஸ் காட்டியுள்ளார் ஸ்ருதி. அவர் க்ளைமாக்ஸில் பேசும் வசனங்களில் அவ்வளவு கூர்மை. ஸ்ருதியின் என்ட்ரிக்கு ரசிகர்கள் ஹார்ட்டீன் விடுவது கன்பார்ம். மேலும் இர்பான் கதாப்பாத்திரம், நிரஞ்சனாவின் அப்பா கதாப்பாத்திரம் ஆகியவை நன்றாக எழுதப்பட்டுள்ளது. அவர்களும் இயல்பாக நடித்துள்ளனர்

பின்னணி இசை கூடுமான வரை கதை சொல்கிறது. பாடல்களும் சிறப்பாக அமைந்துள்ளது. ஒளிப்பதிவில் பட்ஜெட் தெரியாத அளவில் நேர்த்தி இருக்கிறது.

சின்ன ட்ராமாவாக துவங்கும் கதை ஸ்ருதியின் என்ட்ரிக்குப் பிறகு சூடுபிடிக்கத் துவங்குகிறது. சில இடங்களில் பிரச்சார நெடி இருந்தாலும் படம் முடிந்தபின்னும் படத்தின் சில காட்சிகள் நமக்குள் ரீவைண்ட் ஆகத்துவங்குகிறது. அந்த வகையில் படம் வொர்த்து. படம் Shortflix-ல் வெளியாகியுள்ளது
3/5
-மு.ஜெகன் கவிராஜ்