கிளாஸ்மேட்ஸ்- விமர்சனம்

குடி குடியைக் கெடுக்கும் என்ற ஒற்றை வரி பிரச்சாரம் தான் க்ளாஸ்மேட்ஸ்

ஹீரோவின் முழு நேர வேலையில் முக்கால் நேர வேலை குடிக்கும் வேலை தான். “இது யாரு பார்த்த வேலை?” என்று கேட்கும்படியான ஒன்லைன் இது. புதிதாக கல்யாணம் முடித்த ஹீரோ, திருமணம் முடித்து பத்து வருடத்திற்கும் மேலாக குடும்பம் நடத்தினாலும் குடியில் வாழும் ஒரு கேரக்டர். இவர்கள் இருவரும் அணுதினமும் குடிக்கிறார்கள். இவர்களால் இவர்கள் சார்ந்தவர்களுக்கு ஏற்படும் இன்னல்கள் தான் படத்தின் கதை

தயாரிப்பாளரே ஹீரோவாக நடித்துள்ளார். மிகச்சில இடங்களில் மட்டும் அவரிடம் நடிப்பு எட்டிப்பார்க்கிறது. எமோஷ்னல் காட்சிகளில் இன்னும் அவர் தேறவேண்டும். சக குடிகாரராக வரும் சரவணன் எதார்த்தமாக நடித்துள்ளார். மறைந்த மயில்சாமி சொல்லிக்கொள்ளும் அளவிலான கேரக்டரில் நடித்துள்ளார். அவர் நடித்த கடைசி படம் இதுவென்பதும், இந்தப்படத்திலே அவர் இறப்பது போல காட்சி உள்ளதும் குறிப்பிடத்தக்கது. சாம்ஸ் கொடுத்த வேலையை குறைவின்றிச் செய்துள்ளார்

பின்னணி இசையில் ஆங்காங்கே ஒலிக்கும் பழைய ஹிட் பாடல்களின் ஓசை நம்மை என்கரேஜ் செய்கிறது. படத்தில் இடம்பெற்றுள்ள பாடல்கள் பெரிதாக ஈர்க்கவில்லை. ஒளிப்பதிவில் நிறைய வறட்சி தெரிகிறது. கேமராமேன் இன்னும் அதீத உழைப்பைக் கொடுத்திருக்கலாம்

குடியால் ஏற்படும் விளைவுகளை ஜாலியாக சொல்ல நினைத்த இயக்குநர் இன்னும் வலிமையான திரைக்கதையை அமைத்திருக்கலாம். நல்லதைச் சொல்வதற்கு சினிமாவை அணுகும் போது நல்ல கலை நேர்த்தியை துணையாக கொள்ள வேண்டும். அப்போது தான் நாம் சொல்ல நினைப்பது வெகு ஜனத்திடம் சென்று சேரும். இவ்வளவு நெருடல்கள் இருந்தாலும் குடி எனும் அரக்கன் மனித வாழ்வில் ஏற்படுத்தும் ஆபத்துகளைச் சொன்ன அந்த நல்ல மனதுக்காக தயாரிப்பாளர்& ஹீரோ அங்கையற்கண்ணனை பாராட்டியே ஆகவேண்டும்

2.25/5
-மு.ஜெகன் கவிராஜ்