ராக்கெட் டிரைவர்- விமர்சனம்

எளிய மெசேச் சொல்லும் பேண்டஸி கதை

2023-ல் தன் வாழ்வை, ஆட்டோ ஓட்டிக்கொண்டு வெறுப்போடு கழித்து வருகிறார் ஹீரோ விஷ்வத். அவருக்கு அறிவியல் ரீதியாக அப்துல் கலாம் போல் சாதிக்க வேண்டும் என்பது ஆசை. ஆனால் சுற்றமும் சூழலும் அவருக்கு சாதகமாக இல்லை என அவர் குறைபட்டுக்கொள்கிறார். திடீரென அப்துல் கலாம் 1958- கால கட்டத்திலிருந்து ப்ளஸ்2 முடித்துவிட்டு நேரடியாக 2023-காலத்திற்கு வந்து ஹீரோ விஷ்வத்தைச் சந்திக்கிறார். அதன்பின் நிகழும் சுவாரஸ்யங்கள் தான் படத்தின் திரைக்கதை

படத்தின் கதாநாயகன் விஷ்வத் என்றாலும் கதையின் நாயகன் இளம் வயது அப்துல் கலாமாக வரும் நாக விஷால் தான். மிகச்சிறப்பாக நடித்துள்ளார். அவரது எளிமை ததும்பும் அந்தக் குரலும், குழைவும் அவர் கேரக்டருக்கு வலு சேர்த்துள்ளது. விஷ்வத் நடிப்பிலும் நல்ல மெச்சூட் இருக்கிறது. சுனைனா கெஸ்ட் ரோல் போலவே வந்துள்ளார். சாஸ்திரியாக வந்துள்ள காத்தாடி ராமமூர்த்தி காமெடிக்கு கியாரண்டி தருகிறார்

கெளஷிக் க்ரிஷ் இசை படத்தின் திரைக்கதைக்கு அந்நியப்படாமல் பொருந்திப் போகிறது. பாடல்களும் இதமாக அமைந்துள்ளது. ரெஜிமெல் சூர்யா தாமஸ் தனது ஒளிப்பதிவால் சிக்கனமான காட்சிகளை கூட கச்சிதமாக காட்ட முயற்சித்துள்ளார்.

“உலகை வியக்க வைப்பது மட்டும் சாதனை அல்ல..ஒரு மனதை மகிழ்விப்பதும் சாதனை தான்” என்ற கருத்தை சிறு வயது அப்துல் கலாம் மூலமாகச் சொல்லவைத்த அந்த திரைக்கதை உத்தி அடடா ரகம். சிறிதும் குழப்பம் ஏற்படாத வகையில் கதையை நகர்த்திச் சென்ற விதமும் சூப்பர். இரண்டாம் பாதியில் படம் பேசிய விசயத்தின் தாக்கம் முழுமையாக நம்மை ஆட்கொள்ள வில்லை..காரணம் வலுவற்ற முன்பாதி. படத்தின் பின்பாதியின் கட்டடத்திற்கு ஏற்ப, முன்பாதியில் அஸ்திவாரம் போட்டிருந்தால் ராக்கெட் டிரைவர் இன்னும் உயரப்பறந்திருப்பார்.

நிச்சயமாக குறைகள் மறந்து கொண்டாட வேண்டிய படம்
3/5
-தமிழ் வெண்பா