அவதார் 2- விமர்சனம்

ஏலியன்களைக் கொன்றொழிக்கச் செல்லும் மனிதக்குழுவில் உள்ள ஒருவனே ஏலியனாய் மாறி, மனிதர்களை விரட்டியடித்த கதை தான் அவதார் முதல் பாகத்தின் கதை.

இந்தப்பாகத்தில் ஏலியனாக மாறி அங்கு குடும்பம் குட்டியென இருந்து விட்ட ஜேக் சல்லியை விட்டகுறை தொட்டகுறையாக அழிக்க வருகிறது பெருங்கூட்டம். தன்னையும் தன் குடும்பத்தையும் காப்பாற்ற ஜேக்சல்லி எடுக்கும் பேரலை வீச்சே இந்த அவதார் 2 கதை

இந்த உலகில் தன்னுயிரை விட தன் குடும்பமே பெரிதென விளங்கும் ஜீவனாக ஜேக் சல்லி நடித்துள்ளார். முழுக்க முழுக்க கிராபிக்ஸ் பின்னணியிலும் கூட நிஜ நீரில், நிஜ காட்டில் நின்று நடிப்பது போலவே நடித்துள்ளார். காலனல் மைல்ஸ் வில்லனத்தில் ஹை-பீச். நெய்ட்ரியின் கேரக்டர் வீரப்பெண்ணை விட தாய்மை உணர்வையே அதிகம் கடத்தியுள்ளது. ஸ்பைடர் கேரக்டருக்கும்,காலனல் மைல்ஸுக்குமான பாண்டிங் நன்றாக எடுபடுகிறது.

பின்னணி இசையிலும் சவுண்ட் எபெக்டிலும் நல்ல தரம் வெளிப்பட்டுள்ளது. கடலுக்குள் CG உதவியோடு வரும் உயிரினங்களின் சிறு சிறு ஒலிகளுக்கும் முக்கியத்துவம் கொடுத்து சவுண்டிங்கில் வேலை செய்துள்ளனர். நிஜக்கடலுக்குள் காட்சிகள் எடுக்கப்படாவிட்டாலும் கிராபிக்ஸ் கடலுக்காக நிஜக்கடலுக்குள் சென்று ஆய்வு செய்துள்ளார் இயக்குநர் ஜேம்ஸ் கேமரூன். அவரது அசாத்திய உழைப்பு அவதாரின் ஒவ்வொரு ப்ரேமிலும் தெரிகிறது.

இரு இனங்களுக்கான வார், இனம் மாறியிருந்தாலும் மனம் இணையும் காதல் என முதல் பாக அவதாரில் நிறைய மேஜிக் இருந்தது. இந்தப்படத்தில் ஹீரோ ஜேக் ஜல்லி கேரக்டர் தன் குடும்பத்தை காப்பாற்ற போரிடுகிறார் என்றும், வில்லன் தன் ஈகோவிற்காக போரிடுகிறார் என்றுமே சுருங்கி விடுவதால் விஷுவலில் பிரம்மாண்டமாக ஈர்க்கும் அவதார்2 திரைக்கதையில் பெரிதாக ஈர்க்கவில்லை. நாம் சந்தித்திராத சந்திக்க சாத்தியமே இல்லாத உலகை திரைமுன் காட்டும் அந்த மாயாஜால விஷுவலுக்காக மட்டுமே அவதார்-2ஐ ரசிக்கலாம்
3/5
-மு.ஜெகன் கவிராஜ்