பனாரஸ்- விமர்சனம்

தெரிந்தே செய்த தவறுக்காக காதலியிடம் மன்னிப்பு கேட்கச் செல்லும் காதலனுக்கு ஏற்படும் அனுபவமே பனாரஸ்

நாயகன் ஜையீத் கான் நினைத்ததை முடிக்கும் பணக்கார வீட்டுப்பையன். நண்பர்களோடு செய்த சவாலுக்காக நாயகி அருகில் இரவு ஒரே கட்டிலில் இருந்து அவருக்குத் தெரியாமல் ஒரு போட்டோ எடுத்து விடுகிறார். அது நாயகி வாழ்வைப் புரட்டிப்போட, செய்த தவறுக்காக மன்னிப்பு கேட்க நாயகியைத் தேடிச் செல்கிறார் நம் ஹீரோ! மேலும் டைம்லூப் சிக்கலிலும் மாட்டுகிறார். முடிவில் ஹீரோவிற்கு என்ன மீட்பு? மாப்பு? என்பதே மீதிக்கதை

ஹீரோ ஜையீத்கான் இயல்பான நடிப்பால் கவர்கிறார். டான்ஸ், பைட் என எல்லாத் தளங்களிலும் ஒரு ஹீரோ மெட்டிரியலாக இருக்கிறார். எமோஷ்னல் காட்சிகளில் மட்டும் இன்னும் கவனம் செலுத்த வேண்டும். நாயகி சோனல் மோண்டோரியோ அழகுப்பதுமையாக இளைஞர்களை கவர்ந்திழுக்கும் காந்தமாக இருக்கிறார். ஒரு பாடல் காட்சியில் இளைஞர்களை தவிக்க விடும் அளவில் தெறிக்க விட்டுள்ளார். ஏனைய கேரக்டர்கள் யாரும் பெரிதாக ஈர்க்கவுமில்லை, சோடை போகவுமில்லை

பி.அஜனீஸ் லோக்நாத் பின்னணி இசை பாடல்கள் இரண்டிலும் ஓரளவு ட்ரெண்ட்-ஐ பிடித்து அடித்துள்ளார். அத்வைதா குருமூர்த்தியின் ஒளிப்பதிவில் காசியின் தரிசனம் கண்களுக்கு இதமாக இருக்கிறது.

ஜெயதீர்த்தா எழுதி இயக்கி இருக்கும் இப்படத்தில் சிற்சில நெருடல்கள் இருந்தாலும் ஒரு கமர்சியல் ஏரியா, ஒரு டைம்லூப் ஏரியா என இரண்டையும் பிரித்து கதை பயணிப்பதால் படத்தை ஏற்றுக்கொள்ளலாம். மன்னிப்பு கேட்பதும் வழங்குவதும் மானிட வாழ்வின் வரம் என இயக்குநர் முன் வைக்கும் முன்பாதி கருத்து நிச்சயமாக ஏற்றுக்கொள்ளக்கூடிய ஒன்று. அதை சுவாரஸ்யமான திரைக்கதையால் இன்னும் வலுப்படுத்தியிருக்கலாம். ஆனாலும் ஒருமுறை பார்க்கலாம் என்ற கேட்டகிரியில் பனாரஸ் பாஸ் ஆகிறது

3/5
-மு.ஜெகன் கவிராஜ்

#Banaras #பனாரஸ்