சந்திரமுகி2- விமர்சனம்
விட்ட இடத்தில இருந்து தொடரணும்.. அதான் பார்ட்2. அதை இந்தச் சந்திரமுகி சரியா செஞ்சிருக்கு. படத்தோட மையமே அந்தப் பங்களா தான். பெரும் பணக்காரரான ராதிகா குடும்பத்துல நிறைய பிரச்சனை. அந்தப் பிரச்சனைகளைத் தீர்க்கணும்னா குலதெய்வக் கோவிலுக்கு வந்து பரிகாரம் பண்ணணும்னு குருஜி சொல்றார். குலதெய்வ வழிபாட்டுக்காக வர்ற குடும்பம் அந்த சந்திரமுகி பங்களாவுல தங்குறாங்க. பங்களா ஓனர் வடிவேலு சில எச்சரிக்கைகளை அந்தக் குடும்பத்திற்கு கொடுத்தும் சந்திரமுகி அறை திறக்கப்படுது.. பிரச்சனைகளும் வருது. இதனைத் தொடர்ந்து நடப்பதெல்லாம் வேட்டையன் சந்திரமுகி விளையாட்டு.
ரஜினி மாதிரியே லாரன்ஸும் பிரச்சனைக்குள்ளான குடும்பத்தோட கெஸ்டா வந்து குடும்பத்துல ஒருத்தரா இருந்து பிரச்சனையை தீர்க்குறார். குறும்பு, ஆக்ஷன், எமோஷ்னல், வில்லத்தனம் என எல்லாத்திலும் ரஜினியின் நகலா வர்றாரு. நகல் என்பதால் நமக்கு சில இடங்களில் அசல் Feel வரவில்லை. ஓவர் ஆல் மிரட்டியுள்ளார். கங்கணா ரணவத் ஆக்ஷன் காட்சி ஒன்றில் மட்டும் நெருப்பாக மாறியிருக்கிறார். வடிவேலு காமெடியில் பெரிய இண்ட்ரெஸ்டிங் இல்லாவிட்டாலும் வெகுசில ஏரியாவில் ஸ்கோர் பண்றார். லெட்சுமிமேனென், மஹிமா நம்பியார், ஸ்ருஷ்டி டாங்கே, பழைய விக்னேஷ், ரவிமரியா, ராதிகா, சுரேஷ்மேனென் என ஒரு டஜன் ஆர்ட்டிஸ் படத்தில். எல்லோருமே கிடைத்த இடத்தில் ஸ்கோர் பண்ணுகிறார்கள்
சந்திரமுகி முதல் பாகத்தின் பெரும் பலங்களில் முக்கியமான ஒன்று பாடல்கள். இந்தச் சந்திரமுகியில் அது சற்று பலவீனமாக இருந்தது. பின்னணி இசையில் மட்டும் கீரவாணி கவனிக்க வைக்கிறார். ஆர்.டி ராஜசேகரின் ஒளிப்பதிவு கச்சிதம். குறிப்பாக சண்டைக்காட்சிகளில் அவரது கேமரா சுற்றி சுழண்டிருக்கிறது
படம் ஆரம்பித்த பத்தாவது நிமிடத்திலே கதை இப்படித்தான் முடியப்போகுது என்பது க்ளீரா தெரிகிறது தான். But 2005-ல் வெளியான அந்தச் சந்திரமுகியை பார்க்காமல் யாராவது இருந்தால் அவங்களுக்கு இந்தப்படம் நல்ல ப்ளஸா இருக்கும். ஒரு குடும்பம், ஒரு தூய ஆத்மா, ஒரு தீய ஆத்மா, இருவருக்குமான பகை என பேய் படங்களுக்கு என்றே எழுதப்பட்ட டெம்ப்ளேட் ஆக இருப்பதால் , படம் முடியும் வரைக்கும் நம் கவனம் சிதறவில்லை. பி.வாசு மேக்கிங்-ல் இன்றைய ரசனைக்கேற்ற பல்ஸை பிடித்துள்ளார். ஏற்கெனவே சொன்னது தான் என்றாலும் எப்படித் தான் சொல்றாங்கன்னு பார்க்கலாம் என்ற ஆர்வத்தை தூண்டுகிறாள் சந்திரமுகி2. உங்களால் பழசை மறக்க முடியும்னா புதுசா நல்லா ரசிக்க முடியும்!
3/5
-மு.ஜெகன் கவிராஜ்