எமோஜி- விமர்சனம்

(காதல் சரக்கு சொட்ட சொட்ட)

தமிழில் வெப்சீரிஸ்கள் ஓரளவு கவனம் பெறக்கூடிய காலகட்டம் இது. சமீபத்தில் வெளியான சுழல் வெப்சீரிஸ் சும்மா சுழற்றி அடித்தது. அதேபோல் இளைஞர்களை குறிவைத்து அடித்திருக்கிறது ஆஹா ஓடிடியில் வெளியாகும் எமோஜி வெப்சீரிஸ்

நாயகன் மஹத் தனது பழைய காதல்(கள்) வாழ்வை நினைத்துப் பார்ப்பதன் வழியே இக்கதை பயணிக்கிறது. முதலில் ஒரு காதலில் அவருக்கு ஒரு ப்ரேம் அப் நிகழ்கிறது. அடுத்தும் எதிர்த்த வீட்டில் தன் காதலனோடு வாழ்ந்து வரும் தேவிகாவை காதலிக்கிறார். (அவரும் தான்) எப்படி இப்படியொரு காதல் பூக்குது…அப்படி பூத்த காதல் ஏன் தோற்றது என்ற கேள்விக்கு 2K கிட்ஸுக்கு ஏற்ற வகையில் பதில் சொல்கிறது எமோஜி.. (ஆக கதை இவ்ளோ தான்)

மஹத் கரியரில் இந்த சீரிஸை வெற்றிகரமான சீரிஸாக எடுத்துக்கொள்ளலாம். பட் ஒரு முழுமையான நடிப்பை அவரால் வெளிப்படுத்த இயலவில்லை என்பது பல காட்சிகளில் தெரிகிறது. நாயகிகளாக வரும் தேவிகா சதீஷும், மானசா செளத்ரியும் பெவிக்கால் போட்டது போல மனதில் ஒட்டிவிடுகிறார்கள். அழகிலும் நடிப்பிலும் இருவரும் அப்படியொரு க்யூட்ஸ்! குறிப்பாக தேவிகா நிறையபேர்களின் தூக்கத்தை கெடுப்பார்..

இந்த சீரிஸில் இன்னொரு ஹீரோ கேமராமேன் ஜவந்தர் வாசன். ஒவ்வொரு ப்ரேமிங்கும் எவர்க்ரீன்! ஸ்க்ரீனில் எவரைப் பார்த்தாலும் அழகாகவே இருக்கிறது. இசை அமைப்பாளர் இன்னும் முனைப்போடு வாசித்திருக்கலாம்

அடுத்து என்ன அடுத்து என்ன என்ற கேள்விகளை எழுப்பாத திரைக்கதை தான் என்றாலும், எந்தக் காட்சியும் போரடிக்கவில்லை. காதல் சரக்கு (ரசமல்ல) சொட்டச் சொட்ட சிலபல காட்சிகளை அடுக்கித் தொகுத்து பெஸ்டிகளுக்கு விருந்தளித்துள்ளார் இயக்குநர் சென்.S.ரங்கசாமி

பத்திரிகையாளர் காட்சியில் 6 எபிசோட்களையும் பார்த்ததும் மனதில் ஒன்று தோன்றியது. எது என்னன்னா…”ஏழாவது எபிசோடையும் பார்த்தே ஆகணும் டூட்”

3/5
-மு.ஜெகன் கவிராஜ்