கருடன்- விமர்சனம்

விசுவாசத்திற்கும் நியாயத்திற்குமான போராட்டமே கருடன்

சிறு வயது சூரிக்கு அடைக்கலம் கொடுத்து தன் வீட்டில் ஒருவனாக நடத்துகிறார் உன்னி முகுந்தன். உன்னி முகுந்தனை துரும்பும் அண்டவிட சம்மதிக்க மாட்டார் சூரி. அப்படியான உன்னி முகுந்தன் தன் நண்பனான சசிகுமார் வாழ்வில் ஒரு சம்பவத்தை நிகழ்த்துகிறார். அந்தச் சம்பவத்தின் கொடூரத்தை அறிந்தும் அறமா அண்ணனா? என அல்லாடுகிறார் சூரி. நட்புக்குள் விரிசலும், விசுவாசத்திற்குள் அரசியலும் புகுந்துவிட, அடுத்தடுத்து என்ன என்பதாக விரிகிறது கருடனின் பயணம்

கதையின் நாயகனாக சூரி. சின்னச் சின்ன எமோஷ்னல் ஏரியாவாக இருந்தாலும், வெடித்துச் சிதறும் காட்சிகளாக இருந்தாலும் நடிப்பை அள்ளிக்கொடுத்துள்ளார். வெள்ளந்தி மனிதனுக்குள் இருக்கும் அத்தனை அறச்சீற்றத்தையும் க்ளைமாக்ஸில் அவர் கொட்டித் தீர்த்துள்ளார். ஒரு Big hug சூரி. சசிகுமார் நீண்ட காலத்திற்குப் பின் திரையில் பெரும் மதிப்பை பெறும் கேரக்டரில் சிறப்பாக நடித்துள்ளார். படத்தின் எமோஷ்னல் தூணாக இருப்பது ஷிவதா தான். நல்ல நடிப்பால் கண்களை நனைய விடுகிறார். ரேவதி ஷர்மா அசத்தியுள்ளார். வடிவக்கரசியும் கம்பீரம் குறையாமல் நடித்துள்ளார். உன்னி முகுந்தன் கேரக்டரில் நிறைய சினிமாத்தனம் இருந்தாலும் அருமையாக நடித்துள்ளார். சமுத்திரக்கனி இன்றைய எதார்த்த காவல் அதிகாரியாக கவனம் ஈர்க்கிறார். ஆர்.வி உதயகுமார், மைம்கோபி வழக்கமான வில்லன்களை நினைவூட்டுகின்றனர்.

படத்தின் டெக்னிஷியன்ஸ்களில் அதிகப்பாராட்டைப் பெறுபவர் ஸ்டண்ட் மாஸ்டர் மகேஷ் மேத்யூ தான். சசிகுமார் கதாநாயகனாக சண்டை போட்டால் சூரி கதையின் நாயகனாக சண்டை போடுகிறார். கேரக்டர்களின் குணாதிசயங்களை நன்றாக உள்வாங்கி ஸ்டண்ட் அமைத்துள்ளார் மகேஷ் மேத்யூ. யுவன் சங்கர் ராஜா பாடல்கள் பின்னணி இசை இரண்டிலும் கருடனுக்கு உதவியுள்ளார். ஒளிப்பதிவாளர் மிகச்சிறப்பான காட்சிகளை கண்களுக்கு விருந்தாக்கியுள்ளார். பிரதீப் ராகவ் ஷார்ப்பான எடிட்டிங்கால் அசத்தியுள்ளார்.

துரை செந்தில்குமாரின் கதை பழகிய கதையாக இருந்தாலும் அவரின் திரைக்கதை மேஜிக் செய்கிறது. கோம்பை அம்மனின் பட்டயத்தைச் சுற்றி எழுந்து வரும் கதை ஒரு கட்டத்தில் கேரக்டர்களின் வாழ்வுக்குள் சென்று படபடக்க வைக்கிறது. ஒரு கோவில் சொத்து, அதை அபகரிக்க நினைக்கும் அமைச்சர், அதற்காக பலியாகும் நட்பு என திகைக்க வைக்கும் திருப்பங்களோடு பயணிக்கிறது கருடனின் திரைக்கதை. மிகச்சிறந்த நடிப்பு, ஆகச்சிறந்த மேக்கிங், என இந்த கருடன் நிறைய சிறப்புகளோடு வட்டமடிப்பதால் நிச்சயமாக தியேட்டர் தரிசனத்திற்கு உகந்தவன்

சம்மர் என்ட்-ல் ஒரு வின்னர்
3.75/5
-மு.ஜெகன் கவிராஜ்