Good night- விமர்சனம்

குறட்டைப் பிரச்சனையை வைத்து மீம்ஸ் பண்ண முடியும்? படம் செய்ய முடியுமா? செய்து காட்டியிருக்கிறார் இயக்குநர் வினாயக் சந்திரசேகரன்

அதீத சத்தத்தோடு குறட்டை விடும் பழக்கம் இருக்கிறது மணிகண்டனுக்கு. அதனால் ஒரு காதல் அவரை கைவிடுகிறது. ஆறுதலான அக்கா, மச்சான், அம்மா, தங்கை என எல்லாம் இருந்தாலும் கூடவே குறட்டையும் அவரை விடாமல் பிடித்துக்கொண்டுள்ளது. இந்தப்பிரச்சனையால் அவர் காதல் பிரச்சனையாக, அந்தப்பிரச்சனைக்கு மருந்திடுவது போல் மணிகண்டன் வாழ்வில் வருகிறார் மீதா ரகுநாத். விரும்பி ஏற்ற வாழ்வில் கோட்டை கட்டும் போது குறட்டை குறுக்கே நிற்க, குடும்பம் பிரியும் சூழல். அந்தச் சூழலில் இருந்து மணிகண்டன் எப்படி மீள்கிறார் என்பதை கலகலப்பாகச் சொல்கிறது குட்நைட்

நாயகன் மணிகண்டன் தானொரு கமர்சியல் ஹீரோ மெட்டிரியல் என்பதை ஸ்ட்ராங்காக நிறுவியிருக்கும் படம் இது. அட்டகாசமாக நடித்துள்ளார். ஒரு ஹீரோவிற்கு காமெடி கை வருவது தமிழில் குதிரை கொம்பு. அந்தக் கொம்பை நச்சென பிடித்துள்ளார் மணிகண்டன். அவர் அடிக்கும் பன்ச்கள் எல்லாமே தாறுமாறு. ரமேஷ் திலக் நானென்ன சும்மாவா? என அவரும் இறங்கி அடித்துள்ளார். முகத்திலும் கண்களிலும் உணர்வுகளை கடத்தி நமக்குள் நுழைகிறார் நாயகி மீதா ரகுநாத். பாலாஜி சக்திவேலும் அவரது மனைவியாக நடித்தவரும் சிறப்பாக கவனம் ஈர்க்கிறார்கள். ரேச்சல் சிறந்த தேர்வாக தெரிகிறார் படத்தில்

மெலோ ட்ராமா கதைக்கே உரித்தான பின்னணி இசையை வழங்கியுள்ளார் ஷான் ரோல்டன். ஆங்காங்கே கதையை நகர்த்துவதற்காக வரும் பாடல்களும் கவனிக்க வைக்கின்றன. ஜெயந்த் சேதுமாதவனின் ஒளிப்பதிவு சிறிய வட்டத்திற்குள் சுழன்றாலும் தரமாக அமைந்துள்ளது

குறட்டை என்பது மிகச்சாதாரண விசயம். அதை இவ்வளவு சிரத்தை எடுத்து ஒரு நல்ல சினிமாவாக மாற்றியதில் மிகவும் கவனிக்கத்தக்க இயக்குநராக முதல் படத்திலே தடம் பதிக்கிறார் இயக்குநர் வினாயக் சந்திரசேகரன். முன்பாதியில் நம் வயிற்றை காமெடியால் பதம் பார்த்த திரைக்கதை பின்பாதியில் சற்று ஸ்லோ நிலைக்குச் சென்று இறுதிக்காட்சிகளில் வேறோர் வேகமெடுத்து முடிகிறது. இந்தப்படம் ஆடியன்ஸுக்கு கேர்ள் பிரண்ட் குட்நைட் சொல்லியும் தூங்காமல் இருந்தால் ஒரு ஹேப்பி வருமே அப்படியொரு ஹேப்பியை கொடுக்கிறது. அந்த வகையில் நம்மை தூங்கவிடாத இந்த குட்நைட்-க்கு நாம் வெரிகுட் சொல்லலாம்
3.5/5
-மு.ஜெகன் கவிராஜ்

#Goodnight