கலகத்தலைவன்- விமர்சனம்
சமூகப்பார்வையோடு கூடிய ஓர் பழிவாங்கல் கதையை தன் ஆக்கப்பூர்வமான திரைமொழியால் அழகான சினிமாவாக மாற்றிருக்கிறார் மகிழ்திருமேனி. திரைக்கதை ஆக்கத்தால் தன்னால் எந்தத் தடையையும் அறவே தாக்க முடியும் என்பதை கலகத்தலைவன் படம் மூலமாக மீண்டும் நிரூபித்திருக்கிறார் மகிழ்திருமேனி. வெல்டன் சாரே
வஜ்ரா என்றொரு பெரும் கார்ப்பரேட் நிறுவனத்தில் பணிபுரிகிறார் உதயநிதி. நிதி அகர்வாலுடன் காதல் கலந்த நட்புடன் பயணிக்கும் அவர் வேறு சில வேலைகளும் செய்கிறார். மேலும் வஜ்ராவின் ரகசியங்களை திருடி விற்பது யார் என்ற தேடுதல் வேட்டையில் மகா வில்லன் ஆரவ் இறங்குகிறார். ஆரவ்வின் தேடலில் உதயநிதி எப்படி லிங் ஆகிறார்…வஜ்ராவின் பின்கதை என்ன? என்ற கேள்விகளுக்கு திரைக்கதை பதிலளிக்கிறது
சாஃப்ட் & ஸ்மார்ட் ஆளாக உதயநிதி கவர்கிறார். உதயநிதியின் நடிப்பில் இயக்குநரின் உழைப்பு தெரிகிறது. நல்ல கதாப்பாத்திர வடிவமைப்பு ஒரு நடிகனை நல்ல நடிகனாக மாற்றிவிடும் தானே!!. நிதி அகர்வால் நல்ல சாய்ஸ் என்றே படம் பார்த்த அனைவரும் சொல்வார்கள். ஆரவ் பல இடங்களில் ஆச்சர்யப்பட வைக்கிறார். கலையரசன் தனக்கு கொடுத்த பாத்திரத்தை சிறப்பாக நிரப்பியிருக்கிறார்
படத்தில் மற்றொரு ஆச்சர்யம் ஸ்ரீகாந்த் தேவாவின் இசையில் வரும் பாடல்களும், காட்சிகளுக்கேற்ற உணர்விசையை வழங்கிய அவரது பின்னணி இசையும் தான். வெற்றி வெற்றி பாஸ். அடுத்ததாக ஒளிப்பதிவு. படம் காட்டும் எல்லா நிலப்பரப்பும் படம் காட்டாமல் நிஜம் காட்டுகிறது. அருமை அருமை
அரசு ஒரு கார்ப்பரேட் நிறுவனத்திற்கு நிறைய சலுகைகளை வழங்குவதன் பின்னணியில் இருக்கும் ஊழலை ஊதிப்பெரிதாக்காமல் உண்மை நிலையை உள்ளபடி சொல்லியிருக்கிறார் இயக்குநர். பொலிசன் பிரச்சனையையும் பிரச்சார நெடியின்றி பேசியிருக்கிறார். உதயநிதி கேரக்டருக்கான ரைட்டிங்கில் தனிக்கவனம் எடுத்திருக்கும் இயக்குநர் படத்தின் பின்பாதி நீளத்திலும் சிறு கவனம் எடுத்திருக்கலாம். துப்பாக்கி படத்தில் வரும் என்கவுண்டர் காட்சி எப்படி பத்தாண்டுகள் கழித்தும் நம்மால் மறக்க முடியவில்லையோ…அதேபோல் இப்படத்தில் ஒரு ரயில்வே ஸ்டேசன் சீக்வென்ஸ் ஒன்றும் மறக்க முடியாது. அட்டகாசம்.
ஒரு நிறுவனம் பெரிய பட்ஜெட்டில் படமெடுத்து ஆச்சர்யப்படுத்துவதல்ல விசயம். நல்ல படமெடுத்து அதை பெரிய படமாக மாற்ற வேண்டும். ரெட்ஜெயிண்ட் அதைச் செய்துள்ளது. டவுட்டே வேண்டாம் கலகத்தலைவன் நல்லபடம் &பெரியபடம் Don’t miss it
4/5
-மு.ஜெகன் கவிராஜ்