கிங்ஸ்டன்- விமர்சனம்

கடலுக்குள் நடக்கும் பேய் யுத்தம்

சொந்தமாக ஒரு போட் வாங்க வேண்டும் என்பது ஹீரோ ஜிவியின் கனவு. அவர் வசிக்கும் பகுதியில் தாம்ஸ் என்பவர் பெரியாளாக இருக்கிறார். அவரின் நல்ல குணங்கள் கண்டு அவர் கூடவே இருக்கிறார் ஜிவி. தாமஸுக்காக கடலுக்குள் சென்று சில கடத்தல் வேலைகளைச் செய்கிறார். ஒரு கட்டத்தில் தாமஸின் உண்மை முகம் ஜிவிக்கு தெரிய வர, ஒரு வார் துவங்குகிறது. இதற்கிடையே ஒரு ஹாரர் சம்பவமும் படத்தில் இருக்கிறது. அதற்கான பின்கதையில் நிறைய இடியாப்பச் சிக்கல் நிறைந்திருந்தாலும். குறிப்பிட்ட பகுதியைச் சேர்ந்த மக்கள் கடலுக்கு முத்துக்குழிக்கச் சென்றால் இறந்துவிடுவார்கள் என்ற ஐடியாவும், அதற்கான காரணமும் பலமாக வொர்க் ஆகிறது.

கதாநாயனாக ஜிவி பிரகாஷ் தன் உடல் பொருள் ஆவி என அனைத்தையும் கொடுத்து நடித்துள்ளார். பின்பாதியில் பேய்களோடு அவர் அல்லாடும் காட்சிகள் ஸ்வீட் சர்ப்ரைஸ். நாயகி திவ்யா பாரதி இயல்பாக கதையோடு பொருந்திப் போகிறார். ஜிவியின் நண்பர்கள் முதல் வில்லன் கேரக்டர் வரை பக்கா ஸ்கெட்ச். ஒரு காட்சி என்றாலும் கதையை மடைமாற்றும் கேரக்டரில் சிறப்பாக நடித்துள்ளார் பத்திரிகையாளர் கயல் தேவராஜ். படம் துவங்கும் போதே அவரின் குரலோடு துவங்குவது கூடுதல் தகவல்

ஒரு ஹாரர் படத்திற்கு முதல் தேவை வரைகலையும் பின்னணி இசையும் தான். இரண்டு டீமுமே சிறப்பான உழைப்பைப் போட்டுள்ளன. ஒளிப்பதிவில் படம் நமக்குப் புதிய அனுபவத்தைத் தருகிறது.

படத்தை மேக்கிங்-ஆக மிரட்டலாக எடுத்துள்ளார் இயக்குநர். குறிப்பாக இடைவேளைக்குப் பிறகான ஆவிகளின் ஆட்டம் அசரடிக்கிறது. பரந்து விரியும் திரைக்கதையின் லேயர்கள் எளிய ரசிகர்களுக்கு குழப்பத்தை ஏற்படுத்தலாம். கதை சொல்லலில் இன்னும் எளிமையை கடைப்பிடித்திருக்கலாம். சிலபல சமரசங்கள் செய்துகொண்டு இந்தக் கிங்ஸ்டனைக் காண நல்ல குவாலிட்டியான தியேட்டருக்கு குடும்பத்தோடு விசிட் அடிக்கலாம்.

2.75/5
-வெண்பா தமிழ்