குடும்பஸ்தன்- விமர்சனம்

மணிகண்டனின் மற்றொரு ஹிட் மெட்டிரியல் இந்த குடும்பஸ்தன்

SC பெண் / நடுநிலைச் சாதி பையன் இருவரும் இரு வீட்டாரின் எதிர்ப்பை மீறி திருமணம் செய்துகொள்கின்றனர். இருவர் மனமும் ஒத்துப் போகும் நல்ல வாழ்வு இருவருக்கும் அமைகிறது. ஆனால் நடுத்தர வர்க்கத்திற்கே உண்டான பொருளாதார இடர்பாடுகள் ஹீரோ மணிகண்டனை வாட்டி வதை செய்கிறது. ஒரு புறம் தன் அக்கா கணவரின் ஈகோவிடம் ஜெயிக்க வேண்டும். ஒருபுறம் தன் வீட்டுக் கமிட்மெண்ட்கள் அனைத்தையும் சமாளிக்க வேண்டும். இவற்றை எல்லாம் மணிகண்டன் எப்படி சரி செய்கிறார் என்பதை சிரி சிரி எனவும், சீரியசாகவும் சொல்லியிருக்கிறார் இயக்குநர் ராஜேஷ்வர் காளிசாமி.

“நடுத்தரவர்க்கத்து ஹீரோ தேவையா? ஒரே சாய்ஸ் மணிகண்டன் தான்” என்று சொல்லும்படி நடுத்தர வர்க்கத்தனாக வாழ்ந்துள்ளார் மணிகண்டன். எமோஷ்னல் காட்சிகளில் மணிகண்டன் தன்னை ஒரு சிறந்த நடிகராக காட்டி ரசிக்க வைக்கிறார். நாயகி சான்வே மேகனா மிக இயல்பாக நடித்து எக்கச்சக்க ஸ்கோர் செய்துள்ளார். குரு சோமசுந்தரம் கேரக்டரின் வடிவமைப்பும் அவரது நடிப்பும் படத்தின் பெரு எனர்ஜி. பாலாஜி சக்திவேல் வழக்கம் போல் அசத்தியுள்ளார். குறிப்பாக டோரை உடைத்துக் கொண்டு அவர் கொடுக்கும் ஒரு ரியாக்சன், குபீர் ரகம். ஆர்.சுந்தர்ராஜன் உள்பட பிற கேரக்டர்கள் அனைவருமே சிறப்பாக கவனம் ஈர்க்கிறார்கள்

படத்திற்கு பாடல்களும் பின்னணி இசையும் பெரிதாக உதவி செய்துள்ளது. இசைஞருக்கு பாராட்டுக்கள். ஒளிப்பதிவாளர் எந்த இடத்திலும் நடுத்தர வர்க்கத்தை மீறாத விஷுவலை கண்களுக்குள் கொண்டு வந்துள்ளார். அதே நேரம் குருசோமசுந்தரம் சம்பந்தப்பட்ட காட்சிகளில் நல்ல பிரம்மாண்டத்தைக் காட்டியுள்ளார்

நேர்மையாக வாழும் ஒருவனுக்கு சமூகமும், குடும்பமும் தரும் வாழ்க்கை நெருக்கடியை மிகவும் எதார்த்தமாக பதிவு செய்துள்ளார் இயக்குநர். முன்பாதியில் மணிகண்டனின் போராட்டங்களில் வேகமெடுக்கும் திரைக்கதை, பின்பாதியிலும் அதையே தொடர்வதால் சற்று அயர்ச்சி ஏற்படுகிறது. க்ளைமாக்ஸில் ஒரு தரமான சம்பவத்தை வைத்தும், ஆங்காங்கே அனைத்து வீட்டிலும் நடக்கும் விசயங்களை படத்திற்குள் கொண்டு வந்தும், “அட இவன் நம்ம குடும்பஸ்தன் பா” எனச் சொல்ல வைத்துவிடுகிறார் இயக்குநர். அதனால் குடும்பஸ்தன் ஹிட் அடிக்கிறான்

குடும்பஸ்தன்- மானஸ்தன்
3.5/5
-வெண்பா தமிழ்