முகுந்தன் உன்னி அசோசியேட்ஸ்- விமர்சனம்

சிறுபொறியை வைத்து அதை பெரு நெருப்பாக்கும் வல்லமை மலையாள பட இயக்குநர்களுக்கு உண்டு. அதை இயக்குநர் அபிநவ் சுந்தர் நாயக்கும் நிரூபித்திருக்கிறார். முகுந்தன் உன்னி அசோசியேட்ஸ் படத்தின் கதை ஹீரோ சீட்டிங் செய்து பெரியவராகும் நார்மல் கதை தான். ஆனால் ஹீரோ எந்தப் பின்னணியை வைத்து முன்னிலைக்கு வருகிறார் என்பதில் சுவாரஸ்யம் கூட்டி அசத்திருக்கிறார் இயக்குநர்

சாதா வக்கீலாக இருக்கும் வினீத் ஸ்ரீனிவாசன் ஸ்பெசல் சாதா எனப்படும் பணக்கார வக்கீலாக மாறத் துடிக்கிறார். அதற்கான இல்லீகல் பாதையை கண்டடைந்து பணம் புகழை அள்ளுகிறார். அந்த இல்லீகல் பாதை என்ன? அதன் விபரீதங்கள் என்னென்ன என்பதே படத்தின் மீதி திரைக்கதையாக விரிகிறது

நாயகன் வினீத் ஸ்ரீனிவாசன் படத்தின் துவக்கத்திலே நமக்குள் கனெக்ட் ஆகிக்கொள்கிறார். அதன்பின் நம் கைப்பிடித்தும், எதிரில் அமர்ந்தும் அவர் நம்மோடு பேசுவது போல் காட்சிகள் அமைந்துள்ளன. அவரும் அருமையாக நடித்திருக்கிறார். அவரைத் தொடர்ந்து சூரஜ்ஜ, வெஞ்சாராமூடு, சுதய்,கோபா, அர்ஷா பைஜு, தன்விராம், ஜார்ஜ்கோரா ஆகியோரும் நல்ல நடிப்பின் மூலம் படத்திற்கு கனம் சேர்த்துள்ளனர்

சிபி மேத்யூ அலெக்ஸ் பின்னணி இசையில் கலை நேர்த்தியுடன் வேலை செய்திருக்கிறார். ஜாலியான படத்திற்கு தேவையான இடத்தை மட்டும் இசைக்கு வழங்கியிருக்கிறார். விஸ்வஜித் ஒடுக்கதில் தன் கேமராவை படத்தின் தேவைக்கேற்ப பயன்படுத்தி படத்திற்கு பலன் கொடுத்துள்ளார்

இன்சூரன்ஸ் க்ளைம் செய்வதில் இருக்கும் தில்லுமுல்லுகளை இவ்வளவு பகடியோடும் வீரியத்தோடும் பதிவு செய்தபடங்கள் மிகக்குறைவு. அதில் ஓர் அழகியலையும் கமர்சியலையும் மிக்ஸ் பண்ணி கொடுத்துள்ளார் இயக்குநர். செய்யும் தொழிலில் தடம் புரள நினைத்தால் அது நிறைய அப்பாவிகளைப் பாதிக்கும். ஆனால் யார் பற்றியும் எனக்கு கவலையில்லை என பயணிக்கும் ஹீரோ கேரக்டருக்கு முடிவில் கொஞ்சம் அறம் உணர்த்திருக்கலாம். மிகச் சாதாரணமாக ஆரம்பித்து டக்கென காமெடி ஜானருக்குள் போய் ஜாலியாக என்ட் கொடுக்கும் முகுந்தன் உன்னியை ரசிக்கலாம்

3.5/5
-மு.ஜெகன் கவிராஜ்