சபா நாயகன்- விமர்சனம்

காதலில் சொதப்பும் ஹீரோ முடிவில் காதலில் ஜெயிக்கும் நார்மல் கதை சபா நாயகன்

ஹீரோ அசோக்செல்வனுக்கு பல காதல்கள் உண்டு. அனைத்துமே புஸ்வானம் ஆகிறது. பள்ளிக்கூடத்தில் துவங்கிய காதல் தோல்வி வரலாறு கல்லூரியிலும் தொடர்கிறது. இப்படியான காதல் பயணத்தில் ஒரு ட்விஸ்ட். அவரது முதல் காதலியே அவர் கை சேரும் சூழல் வருகிறது. அந்தச் சூழல் தந்த வாய்ப்பை அசோக்செல்வன் எப்படி பயன்படுத்தினார் என்பதே மீதிக்கதை

குறுகுறு பையன், துருதுரு இளைஞன் என அசோக்செல்வன் அசால்டாக ஆடியுள்ள மேட்ச் இது. சில இடங்களில் ரஜினி ரெபரன்ஸை வைத்து சின்னதாக ப்யூச்சர் லீட் கொடுக்கிறார். அவருக்காகவே ஒரு ஆக்சன் சீக்வென்ஸ் வேறு! கலக்குங்க. அடுத்ததாக மூன்று ஹீரோயின்கள். கார்த்திகா முரளிதரன், சாந்தினி, மேகா ஆகாஷ். இவர்களில் கார்த்திகா முரளிதரன் மனதில் பதியும்படி நடித்துள்ளார். அருண், ஜெய்சீலன், ஸ்ரீராம் உள்ளிட்ட அனைவரும் நல்ல தேர்வு

லியோன் ஜேம்ஸின் இசையில் பாடல்களில் பெரியளவில் துள்ளல் இல்லை. அதற்கும் சேர்த்து பின்னணி இசை படத்திற்கு பலம் சேர்த்துள்ளது. பாலசுப்ரமணியம், தினேஷ் புருஷோத்தமன், பிரபு ராகவ் என மூன்று ஒளிப்பதிவாளர்கள் படத்தில். But ஒரே மூட்-ஐ செட் செய்து உழைத்துள்ளனர். விஷுவல்ஸ் அனைத்தும் நைஸ்

கதையாகவே சிம்பிள் லைன் என்பதால் படம் பெரிய இம்பேக்டை தரவில்லை. நீளம் படத்தின் பெரிய சோகம். அசோக்செல்வன் தன் நண்பனை டாக்டர் என பொய் சொல்லி நடத்தும் ஒரு ரணகள சீக்வென்ஸ் மட்டும் உருப்படியான காமெடி. மற்ற காட்சிகள் எல்லாம் ஆவ்ரேஜ் ரகமே. கல்லூரி கால காதலை அடிப்படையாக வைத்து படம் வந்து நீண்ட நாட்களாயிற்று. இன்னும் படத்தை ஷார்ப் செய்து, சில புது சீக்வென்ஸ்களை இறக்கியிருந்தால் சபா நாயகன் கதாநாயகன் ஆகியிருப்பார். இப்போது சப்போர்ட் நாயகனாக ஆறுதல் அளிக்கிறார்
2.75/5
-மு.ஜெகன் கவிராஜ்