சிங்கப்பூர் சலூன்- விமர்சனம்

சலூன் கடை வச்சி சகலரையும் திரும்பி பார்க்க வைக்கிற ஹீரோ. சகலரையும் திரும்பி பார்க்க வைப்பதற்கு அவர் சந்திக்கும் போராட்டங்கள் என்னென்ன என்பதை காமெடி கலந்து சொல்லியிருக்கிறார் இயக்குநர் கோகுல். கூகுள்ல தேடுனா கூட கிடைக்காத சின்னச் சின்ன ஐடியாக்களை திரைக்கதையில் கோர்த்து விட்டு சிரிக்க வைக்கிறார் கோகுல். சத்யராஜுக்கு லைப்டைம் காமெடி கேரக்டர் எனச் சொல்லுமளவு அடிப்பொலி ரகம். ரோபோசங்கர் பல இடங்களில் தரமான காமெடியை இறக்குகிறார். ‘பாய்பெஸ்டின்னா என்னடா?’ என்று கேட்கும் போதும், ‘உன் அப்பா சொன்னாலும் கரெக்டா இருக்கும்’ என்று உருகும் போதும் தலைவாசல் விஜய் தன் நடிப்பால் தலை நிமிர்ந்து நிற்கிறார். பெண் கேரக்டர்கள் கொடுத்த வேலையைக் குறைவின்றி செய்துள்ளனர். ஹீரோ ஆர்.ஜே பாலாஜி தன் அளவறிந்து அசத்தியுள்ளார். பாய்பெஸ்டிக்கு அவர் குடுக்கும் விளக்கமெல்லாம் 2K கிட்ஸ் கொண்டாடும் காமெடி. சில எமோஷ்னல் ஏரியாவையும் சமாளிக்கும் நடிப்பு அவருக்கு வாய்த்துள்ளது. படத்தில் நாயகன் வாழ்வின் திருப்புமுனையாக வரும் கேரக்டரில் லால் நடித்துள்ளார். நிச்சயமாக எக்காலத்திலும் இந்த லால்-க்கு சலாம் போடலாம்.

பின்னணி இசையும் பாடல்களும் ஓரளவு கவனம் ஈர்க்கின்றன. ஒளிப்பதிவாளர் கண்ணும் கருத்துமாக தன் கேமராக்கண்களை இயக்கியுள்ளார். சிஜி மட்டும் இன்னும் டெப்த்தாக இருந்திருக்கலாம். டெக்னிஷியன்களில் குறிப்பிட்டுச் சொல்லவேண்டியவர் நடன மாஸ்டர் பூபதி. இடைவேளைக்குப் பின்பான படத்தில் பெரும்பகுதி டான்ஸ் வருகிறது. அந்த டான்ஸ் மூவ்மெண்ட்களை சிறப்பாக அமைத்து கவனம் ஈர்க்கிறார்

முடிவெட்டும் ஒரு தொழிலாளி தன் தொழிலில் மிகப்பெரிய அச்சீவராக மாறும் பாசிட்டிவ் கதை என்பதால் கதை அளவிலே படம் பாதிக்கிணற்றை தாண்டுகிறது. பின்பாதியில் திரைக்கதையை கன்னா பின்னாவென பாய விடாமல் ஒரே சீராக படத்தைக் கொண்டு போயிருந்தால் இந்தச் சலூனுக்குள் நம்பி தலையைக் கொடுக்க முடியும். தற்போது பிப்டி பிப்டி ரேஞ்சிலே படம் தடுமாறி நிற்கிறது. முன்பாதியில் நல்ல நல்ல காமெடி காட்சிகளால் வாய்விட்டுச் சிரிக்க வைத்தவர்கள், பின் பாதியில் மனம் விட்டு அழ வைக்க முயற்சித்துள்ளனர். அழுத பிள்ளை சிரிக்கும். சிரிச்ச பிறகு எப்படி அழுவுறது?
3/5
-மு.ஜெகன் கவிராஜ்