Star- விமர்சனம்
நச் என்று ஒரு பாசிட்டிவ் சினிமா
சினிமாவில் ஹீரோ ஆகணும். நினைச்ச வாழ்க்கை கை கூடணும் என்ற நம்பிக்கை கொண்ட இளைஞனாக கவின். கல்லூரிக் காலத்திற்கும் முன்பே சினிமா ஆசை அவரை பிடித்தாட்டுகிறது. அதற்காக அவர் சுற்றத்தையும் சொந்தத்தையும் தாண்டி போராடுகிறார். ஒரு கட்டத்தில் வாய்ப்பு கை கூடிவரும் போது அந்த துர் சம்பவம் நடக்கிறது. அந்தச் சம்பவம் என்ன? அதன்பின் கவினின் கனவு நிறைவேறியதா? என்பதே ஸ்டாரின் கதை
ஹீரோவாக தன் கரியரை மிக அழகாக வடிவமைத்த வரும் கவினுக்கு இந்தப்படமும் ஒரு சிகப்பு/ சிறப்பு கம்பளம். அப்பாவிடம் வசனத்தை பேசிக்காட்டும் காட்சி ஒன்றில் அவருக்குள் இருக்கும் கலைத்தாகம் வெளிப்படுகிறது. லால் தன்னைவிட யாரும் ஸ்கிரீனில் ஸ்கோர் செய்துவிடக்கூடாது என்பதில் கவனமாக இருந்துள்ளார். மனிதர் வரும் எல்லாக் காட்சிகளிலும் சிறப்பாக நடித்துத் தள்ளுகிறார். அவரின் மனைவி கேரக்டரும் அட்டகாசமாக எழுதப்பட்டுள்ளது. அவரது நடிப்பும் ஆயிரம் வாலா பட்டாசு.
முதலில் வரும் ஹீரோயின் 2K கிட்ஸ் ரேஞ்சில் வந்து லைக்ஸை அள்ளினால், இரண்டாவதாக வரும் ஹீரோயின் 90 கிட்ஸ் Feel-ல் வந்து ஹார்ட்டீன்ஸை அள்ளுகிறார். மாறனை காமெடி செய்யவிடாமல் குணச்சித்திர வேடத்தில் காட்டியது நல்ல நகர்வு. காதல் சுகுமார் பாத்திரமும் செம்ம
படத்தின் ஜீவனாக இருக்கிறார் யுவன். புதுப்பேட்டை படத்தின் பாடலை இப்படத்தில் ஒலிக்கவிட்டு, தியேட்டரை தெறிக்கவிட்டுள்ளார். காட்சிகளைத் தாண்டியும் ஆர்.ஆரில் ஸ்கோர் அடிக்கிறார் யுவன். ஒளிப்பதிவும் மிகத்தரமாக அமைந்துள்ளது. நல்ல நல்ல ஷாட்களை அமைத்துள்ளார் கேமராமேன்
படம் துவங்கிய வேகத்திலும் சரி, ஆங்காங்கே நிற்கும் நிதானத்திலும் சரி கதையின் சரடு எங்குமே விலகவில்லை.. இதுவொரு பாசிட்டிவ் அம்சம். ஹீரோ கேரக்டர் தடுமாறியும் தடம் மாறியும் நிற்கும் போது சப்போட்டிங் கேரக்டர்கள் வந்து கொடுக்கும் உத்வேகம் நல்ல முன்னெடுப்பாக அமைந்துள்ளது. நம் கனவுகள் கை நழுவும் போது நாம் அந்தரத்தில் நிற்போம். அப்போது ஆண் கையோ, பெண் கையோ எதோவொரு கை நம்பிக்கையாக வந்து நம்மை பற்றவேண்டும். அப்போது தான் இழந்த எல்லைகள் அருகில் இருப்பதாய் தெரியும், இருளும் சின்னதாக ஒளிவிடும். படத்தில் அப்படியான மொமெண்ட்ஸ் நிறைய இருக்கிறது. Finally படம் சொல்வது ஒன்றே ஒன்று தான்
“யார் வேணா உங்களை ரிஜெக்ட் பண்ணலாம். ஆனா நீங்க உங்களை ரிஜெக்ட் பண்ணவே கூடாது. அப்பதான் நீங்க ஸ்டார்”
3.5/5
-மு.ஜெகன் கவிராஜ்