வதந்தி- விமர்சனம்
புஷ்கர் காயத்ரி கிரியேட்டிவ் தயாரிப்பாளர்களாக இருந்து,அமேசான் ப்ரைம் தயாரித்து வெளியிட்டுள்ள வெப்சீரிஸ் வதந்தி.
உண்மை நடக்கும் பொய் பறக்கும் என்ற ஒற்றை வசனம் தான் வதந்தியின் எட்டு எபிசோட்களையும் நகர்த்துகிறது. கன்னியாகுமரி அருகே ஒரு பயங்கரமான குற்றச்சம்பவம் நடக்கிறது. அதன் பின்னணியில் இருப்பவர்கள் யாவர்? என்ற கேள்விக்கான பதிலே வதந்தியின் திரைக்கதை
எஸ்.ஜே சூர்யா நிதானமாக நடித்துள்ளார். பெரும் பரபரப்பு எதையும் உடல்மொழியில் காட்டாமல் இயல்பான பதட்டத்தை கொண்டு வந்துள்ளார். அது அவரது எஸ்.ஐ கேரக்டர் மீதான நம்பகத்தன்மையை அதிகப்படுத்துகிறது. சஞ்சனா துளியும் சலனமற்ற சிரிப்பாலும் முகபாவனைகளாலும் நம் நெஞ்சை நிறைக்கிறார். லைலாவின் நடிப்பிற்கு நல்ல தீனி இந்த சீரிஸ். நாசர், ஹரிஷ் பேரடி, இருவரும் சின்னச் சின்ன ரியாக்ஷன்களிலே கதையை நகர்த்துகின்றனர். காட்டுக்குள் வாழும் ஒரு அம்மாவும், அவர்களின் மூன்று மகன்களும் அதி பயங்கரம். கன்னியாகுமரி மாவட்ட வட்டார வழக்கை இயல்பாக பேசி ஈர்க்கிறார் விவேக் ப்ரசன்னா. அவரின் இருப்பு வதந்திக்கு ப்ளஸ்
சைமன் கே கிங் பின்னணி இசையில் மிரட்டியிருக்கிறார். காடுகளில் பயணிக்கும் காட்சிகளில் அவரின் இசை பெரும் அதிர்வை கூட்டுகிறது. சரவணன் ராமசாமியின் கேமரா கன்னியாகுமரியின் அழகை அச்சுப்பிறழாமல் அள்ளி வந்துள்ளது. இருட்டில் நடக்கும் காட்சிகளை சிறப்பாக படம் பிடித்துள்ளார். எடிட்டரின் வேலையில் சற்று ஷார்ப்னெஸ் மிஸ் ஆகியுள்ளது..
சீரியஸான கதையை எடுத்தாண்டுள்ள இயக்குநர்
ஆண்ட்ரு லூயிஸ் ரைட்டிங்கில் ஆழமான உழைப்பைப் போட்டுள்ளார். ஒரு பெண்ணிற்கு குழந்தையில் இருந்தே ஏற்படும் உளவியல் சிக்கலை நுட்பமாக விவரித்துள்ளார். சீரிஸின் மிக முக்கியமான ஒரு கேரக்டருக்கும், சஞ்சனா கேரக்டருக்குமான முரணை மிக அழகாகச் சித்தரித்துள்ளார். ஆனால் பெண்ணியம் சார்ந்து அவர் பேசியிருக்கும் விசயங்களில் அரசியல் போதாமை தெரிவது ஒருகுறை. நாம் நிறையபேர்களை சந்தேகப்பட வேண்டும் என்பதற்காக சீரிஸில் நிறைய கேரக்டர்கள் இருக்கிறார்கள். நான்காவது எபிசோடைத் தாண்டும் போது நமக்கு அது சலிப்பைத் ஏற்படுத்துகிறது. எஸ்.ஜே சூர்யாவின் விசாரணை நீள நீள…எங்கு அவர் நம்மையும் விசாரிப்பாரோ என்ற மனநிலை சீரிஸ் பார்க்கும் நமக்கே தோன்றிவிடுகிறது. ரைட்டிங்கில் இருந்த அழுத்தம் ஸ்டேஜிங்கில் இருந்தாலும், இந்தக்கதை முடிவதற்கான நேரத்தையும் தாண்டி பயணிப்பதால் பயணம் சற்று அலுக்கவே செய்கிறது. ஆனாலும் இந்த வதந்தி சொல்லும் சொல்லும் சில நீதிகளுக்காக ஆற அமர்ந்து பார்க்குமளவில் நேரம் வாய்த்தால் பார்க்கலாம்
3/5
-மு.ஜெகன் கவிராஜ்