விக்ரம்- விமர்சனம்
லோகேஷ் கனகராஜின் மற்றொரு ஆக்ஷன் மசாலா. அட்டகாசமான காஸ்டிங், வெறித்தனமான பின்னணி இசை, ஹாலிவுட் தர மேக்கிங் என விஷுவல்லி ஓர் பெரிய மாஸ் ஷாட் இந்த விக்ரம்.கன்டெனெய்ரில் மிஸ் ஆன 2 லட்சம் கோடி மதிப்பிலான போதைப்பொருட்களை கைப்பற்ற மாஃபியாக்களும், கரை படிந்த அதிகாரிகளும் திட்டமிட, அந்தத் திட்டத்தை நேர்மையான ஏஜெண்ட் டீம் எப்படி எதிர்கொண்டு வென்று வெற்றிக்கொடி நாட்டுகிறார்கள் என்பதே படத்தின் கதை
இத்தனை பெரிய நடிகர்களை வைத்துக் கொண்டு மிக சாமர்த்தியமாக திரைக்கதை அமைத்து ஆளாளுக்குச் சமமாக ஸ்பேஸ் கொடுத்து ஸ்கோர் செய்ய வைத்திருக்கிறார் லோகேஷ். கமலின் பாத்திரம் நாம் பாத்திராத பாத்திரம் இல்லை என்றாலும் ஒருசில சீன்களில் மிக காத்திரமான நடிப்பால் அசரடித்துள்ளார். விஜய்சேதுபதியின் தோற்றமும் உடல்மொழியும் “என்னடா வில்லன் இவன்..இப்படி மிரட்டுறான்”! என ஆச்சர்யபட வைக்கிறது. பகத்பாஷில் வெரி வெரி டீசண்ட் பெர்பாமன்ஸ். சிலதுளி நேரமே என்றாலும் சூர்யாவின் என்ட்ரி காட்சி அசத்தல். சூர்யாவின் லுக்& அசால்ட் நடிப்பு கெத்து. காயத்ரி, நரன், காளிதாஸ் என படமெங்கும் உள்ள நட்சத்திரங்கள் அனைவருக்கும் நறுக் தெறித்தாற்போல் கேரக்டர் கொடுத்து அசத்தியுள்ளார் லோகேஷ் கனகராஜ்
க்ரீஸ் கங்காதரனின் ஒளிப்பதிவில் விக்ரம் என்ற தமிழ்சினிமா உலகத்திரைப்படத்தை கண்முன் நிறுத்துகிறது. இப்படத்தின் மற்றொரு ஆன்மா அனிருத்தின் பின்னணி இசை. எந்த இடத்தில் இசை தேவையில்லை என்பதே கண்டடைபவரே நிஜமான இசைஞன். அனி நிஜ இசைஞன். அன்பறிவின் ஆக்ஷன் மேளா எல்லாமே அல்டிமேட் ரகம்
மேக்கிங்கில் பலபடி முன்னேறி நிற்கும் விக்ரம் எமோஷ்னல் ஏரியாக்களில் மட்டும் சற்று தேங்கி நிற்கிறார். கைதி படத்தின் சீக்வெல்களை ஆங்காங்கே சரியாகப் பொருத்தியதைப் போல..கேரக்டர்களின் தனித்தனி இலக்குகளைப் பக்காவாகவும் எளிமையாகவும் தீட்டியிருந்தால் திரை தீப்பிடித்திருக்கும். ஆனாலும் இப்படியொரு மாஸ் அனுபவத்தை தவற விடக்கூடாது. ஆக விக்ரம் ஓடும் தியேட்டருக்கு ஒருமுறை விசிட் அடிக்கலாம்
-மு.ஜெகன் கவிராஜ்