விட்னஸ்- விமர்சனம்

வணிகம் சார்ந்த படங்களுக்கு மத்தியில் இப்படியான மனிதம் சார்ந்த படங்கள் வருவது அபூர்வம். அப்படியான படங்களை கொண்டாடும் சூழல் தமிழில் மெல்ல மெல்ல உருவாகி வருவதும் ஒரு பாசிட்டிவ் Way எனலாம்

விட்னஸ் படம் அதிகாரத்திமிறை வெட்ட வெளிச்சமாக பேசியிருக்கிறது

ரோஹினியின் மகன் விருப்பமில்லாமல் மலக்குழியை சுத்தம் செய்ய இறக்கி விடப்படுகிறார். அவரை விஷவாயு தாக்குகிறது. அநியாயமாக இறக்கிறார். ரோஹினிக்கு அது பேரடியாக அமைய, மகனின் மரணத்திற்கு காரணமானவர்களை நீதியின் முன் நிறுத்த போராடுகிறார். போராட்டத்தின் முடிவு என்ன? என்பதே விட்னஸ்

தூய்மைப்பணியாளராக ரோஹினி தோழர் முதல் ஷாட்டிலிருந்தே நம்மை ஈர்க்கிறார். மகனை இழந்த தாயாக அவர் காட்டும் ரியாக்‌ஷன்கள் நெஞ்சில் கணமேற்றுபவை. ஷரத்தா ஸ்ரீநாத் கேரக்டர் கதைக்குள் முழுமையாக பொருந்தா விட்டாலும், நடிப்பில் அவரும் குறை வைக்கவில்லை. செங்கொடி ஏந்தும் தோழராக வருபவர் உள்ளிட்ட நடிகர்கள் எல்லோருமே கதைக்கு நியாயம் சேர்க்கத் தவறவில்லை

பின்னணி இசையில் செம்மஞ்சேரி குடிகளின் வலியும் வாழ்வும் பதிவு செய்யப்பட்டுள்ளது. பேசப்பட வேண்டிய
கதையை இயக்குநர் தீபக் சமரசமின்றி பேசியிருக்கிறார். அவரே ஒளிப்பதிவாளரும் என்பதால் எழுத்தும் கேமராவும் ஒன்றாக பயணித்துள்ளது. அது நன்றாக வொர்க்கவுட் ஆகியுள்ளது. நீதிமன்ற காட்சிகளில் பட ஆக்கத்தில் சிறு போதாமை இருந்தாலும் காட்சிகளின் காத்திரம் நமக்குள் பரவுகிறது. கிளைக்கதைகளுக்கு சிறு சிறு முக்கியத்துவம் கொடுத்திருப்பதைத் தவிர்த்திருக்கலாம். குறிப்பாக ஷரத்தா ஸ்ரீநாத் கதைக்கு.

சாமானியன் பாதிக்கப்பட்டால் அவன் ஒதுங்கித் தான் போக வேண்டும். ஓங்கி குரல் கொடுத்தால் அதை அடக்க அதிகாரம் எந்த ஆயுதத்தை வேண்டுமானாலும் எடுக்கும் என்பதை முகத்தில் அறைந்து சொல்லியிருக்கிறார் தீபக். அதிகாரம் எந்த ஆயுதத்தை எடுத்தாலும் அதை எதிர்கொள்ளும் மனதிடத்தை வளர்ப்பதே நமது கடமை என்பதையும் இயக்குநர் பதிவு செய்யத்தவறவில்லை. எத்தனை முறை அறம் தோற்றாலும் பரவாயில்லை. இன்னும் அறம் இருக்கிறதே என்ற ஆறுதலோடு போராடுவோம் என்ற சித்தாந்தம் கதையில் பூசப்பட்டுள்ளது. மிக முத்தான க்ளைமாக்ஸ் படத்தின் ஆகப்பெரும் பலம். கிடைத்த பட்ஜெட்டை வைத்து எமோஷ்னல் பேக்கேஜ்-ஆக படத்தை முடித்துள்ளார் இயக்குநர். விட்டுப்போன விசயங்கள் படத்தில் சில இருந்தாலும் இந்த விட்னஸ் தமிழ்சினிமாவின் தனித்ததோர் அடையாளம்!

விட்னஸ் சோனிலைவ்- ஓடிடி தளத்தில் 09.12.2022 அன்று வெளியாகிறது. அவசியம் பாருங்கள்..

3.5/5

-மு.ஜெகன் கவிராஜ்