ஆகஸ்ட்16. 1947- விமர்சனம்
நாட்டின் தேசப்பற்றுக்கு நடுவே ஒரு காதல் நேசப்பற்றைச் சொருகினால் அது தான் ஆகஸ்ட் 16. 1947
விருதுநகர் அருகே செங்காடு என்றொரு கிராமம். 1947 ஆகஸ்ட் 10-ஆம் தேதி துவங்குகிறது கதை. ராபர்ட் என்றொரு அரக்கத்தனம் கொண்ட வெள்ளைக்காரன் செங்காடு மக்களை அடிமைகளாக வைத்து வாட்டி வதைக்கிறார். இன்னும் 5 நாளில் சுதந்திரம் கிடைக்கவுள்ளது என்று தெரியாமலும், ஆகஸ்ட் 15 சுதந்திரம் கிடைத்து விட்டது என்று தெரியாமலும் அந்த மக்கள் வதை படுகிறார்கள். அவர்களின் வதைகளின் நடுவே முளைக்கும் கெளதம் கார்த்திக்கின் காதல் கதை என்னானது என்பதே படத்தின் திரைக்கதையாக விரிகிறது
வெட்டு ஒன்னு துண்டு ரெண்டு என இறங்கி ஆட வேண்டிய களம் கெளதம் கார்த்திக்கு. இருந்தும் மிக நார்மல் ஆட்டத்தையே ஆடியிருக்கிறார். இன்னும் நிறைய எக்ஸ்ப்ரசன்ஸ்களில் மிரட்டியிருக்கலாம். ஆனால் அவருக்கும் சேர்த்து ஆடியிருக்கிறார் நடிகர் புகழ். மிகச்சிறந்த நடிப்பு புகழின் நடிப்பு. அவரின் கேரக்டர் வார்ப்பும் நச். வில்லனாக வரும் ரிச்சர்ட் என்ற ஆங்கிலயேர் தான் படத்தின் தூண் எனலாம். என்னவொரு வில்லனத்தனம். மனிதர் மிரட்டியிருக்கிறார். அவர் மகனாக வருபவரின் நடிப்பும் மிரட்டல். பல வயதானவர்கள்,குழந்தைகள் என அனைவருமே நடிப்பில் கவர்கிறார்கள். மதுசூதனராவ் கேரக்டர் சிறப்பாக கையாளப்பட்டுள்ளது. அவரும் நன்றாக நடித்துள்ளார். ஹீரோயின் ஆரம்பத்தில் தடுமாறினாலும் போகப்போக பிக்கப் ஆகி நமக்குள் வந்துவிடுகிறார்
பின்னணி இசையின் கணம் தான் இப்படத்தின் ஆன்மா. அதை உணர்ந்து ஒருசில இடங்களில் ஸ்கோர் செய்துள்ளார் இசைஞர். ஒளிப்பதிவில் 1947 காலகட்டத்திற்குரிய லைட் செட்டப்பை கொண்டு வந்து அசத்தியுள்ளார் கேமராமேன். ஆர்ட் டைரக்டரின் உழைப்பும் அசாத்தியமானது. காஸ்ட்யூம்ஸ் டிசைனர் & மேக்கப் டிப்பார்ட்மெண்ட் உழைப்பும் மெச்சத்தக்கது. டெக்கினிக்கல்லி படம் பக்கா
நம்மை உணர்ச்சிப் பிழம்பாக்க வேண்டிய தருணங்களைச் சரியாக கோர்க்காமல் நல்ல வாய்ப்பை பல இடங்களில் தவறவிட்டுள்ளார் இயக்குநர் பொன்குமார். தேசப்பற்றை கொண்டு வந்து பல இடங்களில் எமோஷ்னல்லி கனெக்ட் செய்தாலும், பல செயற்கையான காட்சிகளைத் தவிர்த்திருக்கலாம். காதலா…? இல்லை ஊர் அடிமைத்தன மீட்டலா? என்ற மீட்டரில் எது இலக்கு? என்று திசையறியாமல் திண்டாடுகிறது திரைக்கதை. மிகச்சிறந்த கதை, அதைத் திரையில் அப்படியே சாத்தியப்படுத்தும் டெக்னிக்கல் டீம் கிடைத்தும், பலவீனமான திரைக்கதையால் சுதந்திரத்தை கொண்டாட முடியவில்லை.
வித்தியாசமான முயற்சி என்ற வகையில் மட்டும் பாராட்டி ஒருமுறை பார்க்கலாம்
3/5
-மு.ஜெகன் கவிராஜ்
#1947AUGUST16 #GauthamKarthik