அரிமாபட்டி சக்திவேல்- விமர்சனம்

சாதியின் தீவிரத்தை படம் பிடித்து காட்டும் மற்றொரு படம்

அரிமாபட்டி என்ற ஊரில் சாதி தான் தெய்வம். அந்த ஊரில் சாதி மாறி திருமணம் செய்யும் ஜோடிக்கு ஊர் என்னென்ன இம்சைகள் கொடுக்கிறது என்பதே படத்தின் திரைக்கதை

அப்பாவியாக நடிக்கும் சார்லியில் இருந்து அடப்பாவிகளாக நடிக்கும் வில்லன்கள் வரை ரெகுலர் டெம்ப்ளேட்டில் நடித்துள்ளனர். ஹீரோ அந்த டெம்ப்ளேட்டுக்குள் அடங்காமல் சில இடங்களில் பரிதவிக்கிறார். ஹீரோயின் இப்படியான படங்களுக்கு எவ்வளவு நடிக்கணும் என்ற அளவைத் தெரிந்து நடித்துள்ளார்

சிறியபடத்திற்கு என்றில்லாமல் நல்ல இசையை வழங்கியுள்ளார் இசைஞர். ஒளிப்பதிவாளர் ஒரு கிராமத்தின் நிலப்பரப்பை துல்லியமாக காட்டியுள்ளார்.

ஏற்கனவே தமிழ்சினிமாவில் பலமுறை அடித்துத் துவைத்துப் போட்ட கதை தான். காட்சிகளிலும் பெரிதாக புதுமை இல்லை. ஆனாலும் சாதியவெறியின் தாண்டவம் இன்னும் கிராமங்களில் அப்படியே தான் இருக்கிறது. அந்த நிஜத்தைச் சொன்னதிற்காக அரிமாபட்டி சக்திவேலைப் பாராட்டலாம்.

-மு.ஜெகன் கவிராஜ்
2.75/5