அவள் பெயர் ரஜ்னி- விமர்சனம்

அவள் பெயர் ரஜ்னி- விமர்சனம்

ஒரு கொலையும் அது சார்ந்த விசாரணையுமே அவள் பெயர் ரஜ்னி

ஹீரோ காளிதாஸிடம் வீடியோ காலில் பேசியபடி காரில் செல்கிறார் காளிதாஸின் அக்கா கணவர் சைஜு கருப். காளிதாஸின் அக்கா நமிதா ப்ரமோத் பின் சீட்டில் தூங்கிக்கொண்டிருக்கிறார். காரில் பெட்ரோல் இல்லை என்ற அலாரம் வருகிறது. போனை கட் செய்துவிட்டு காரை நிறுத்துகிறார் சைஜு குருப். மனைவியை காரிலே இருக்கச் சொல்லிவிட்டு, பெட்ரோல் வாங்கி வரும் அவரை, காரில் மேல் பாகத்தில் கொடூரமாக கொலை செய்கிறது ஒரு உருவம். அந்த உருவம் ஆணா? பெண்ணா? அவர் கொலை செய்யப்பட்டதற்கான காரணம் என்ன என்பதாக கதை விரிகிறது.

காளிதாஸ் மிகவும் மேலோட்டமாக நடித்துள்ள படம் இதுவாகத்தான் இருக்கும். அக்கா கணவரின் கொலைக்கான தீர்வைத் தேடி அவர் அலையும் காட்சிகளில் இருக்கும் திரில்லிங் அவர் நடிப்பில் வெளிப்படவே இல்லை. இன்வெஸ்டிகேஷன் போலீஸாக வரும் அஷ்வின் கே குமார் நன்றாக நடித்துள்ளார். குற்றவாளியைப் பிடிக்க அவர் காட்டும் முனைப்பு நமக்குள்ளும் பற்றுகிறது. நாயகி நமிதா ப்ரமோத் ஓகே ரகம். சில காட்சிகளில் வந்தாலும் கருணாகரன் கலகலக்க வைக்கிறார். ரெபா மோனிகாவின் நடிப்பு படத்தின் பெரும்பலம்

திரில்லர் இன்வெஸ்டிகேஷன் படங்களுக்கு எப்படியான இசை தேவையோ அதைச்சரியாக வழங்கியுள்ளார் இசைஞர். கேமராமேன் ஆர்.ஆர் விஷ்ணு நல்ல கலரிங்-ஐ தேர்வு செய்துள்ளார். ப்ளாஸ்பேக் காட்சிகளுக்கான விஷுவலில் நல்ல மெனக்கெடல் தெரிகிறது. தீபு ஜோசப்பின் எடிட்டிங் ஷார்ப்பாக அமைந்துள்ளது

ஒரு நல்ல துவக்கத்தோடு அமைந்த படத்தின் க்ரிப்-ஐ முடிவு வரை கொண்டு சென்றிருப்பது சபாஷ் போட வைக்கிறது. திரைக்கதையில் சின்னச் சின்ன உத்திகளை கையாண்டு ஆடியன்ஸுக்கு சர்ப்ரைஸ் கொடுத்திருப்பது சிறப்பு. கொலைக்கான காரணமாக கொலை செய்தவர் சொல்லும் பின்கதையும் அசத்தல் ரகம். இவையெல்லாம் இருந்தும் ஒன்றாக குவிய வேண்டிய எமோஷ்னல் இரண்டாகப் பிரிந்து விடுவது படத்தை நெஞ்சோடு அணைக்க முடியாத நிலைக்கு நம்மைத் தள்ளிவிடுகிறது. கொலையுண்டவர் குடும்பத்திற்கு கிடைத்த ஆறுதலை நாம் முழுமையாக ஏற்க முடியவில்லை. கொலை செய்தவர் பக்கம் இருக்கும் நியாயத்தை இயல்பாக மறுக்க முடியவில்லை. படம் முழுதாக சறுக்கியது இங்குதான். இருப்பினும் கிராமத்தில் இருக்கும் ஒரு இளைஞன் தன் தம்பி திருநங்கையாக மாறியதை முதலில் அலுத்தாலும் பின் அணைத்துக் கொண்ட விதம் ஆஹா என நெக்குருக வைத்தது. அந்த ஒரு சீக்வென்ஸுக்காகவே அவள் பெயர் ரஜ்னிக்கு ஹார்ட்டீன் விடலாம்!
3/5
-மு.ஜெகன் கவிராஜ்