கான்ஜுரிங் கண்ணப்பன்- விமர்சனம்

ட்ரீம்கேமில் மாட்ட வைக்கும் பேய்களும், மாட்டிய மனிதர்களும் ஆடும் ஆட்டம் இது

ஹீரோ சதிஷ் பூமர்கள் நிறைந்த இந்த உலகத்தில் வேறலெவல் கேமராக வாழ்ந்து வருகிறார். அவருக்குள் கேம் டெவலப்பில் சாதிக்க வேண்டும் என்ற கனவும் உண்டு. மற்றபடி உண்ணுவது, சுற்றுவது, இண்டெர்வியூ அட்டர்ன் பண்ணி சொதப்புவது என பொழுதைக் கழிக்கும் அவர் வாழ்வில் மூன்று பேய்கள் வருகிறார்கள். ட்ரீம் கேச்சர் என்ற ஒரு பொருள் மூலமாக கனவு உலகத்தில் சதிஷ் உள்பட சிலபலர் மாட்டுகிறார்கள். அதில் இருந்து மீளும் வழியை கண்டறிந்து கண்டம் ஆகாமல் எப்படி எல்லோரும் தப்பிக்கிறார்கள் என்பதே கலகல கதை

சிக்ஸும் போரும் இல்லாட்டியும், நாட் அவுட் ஆகாமல் ஆடி இந்த கேமை காப்பாற்றுகிறார் சதிஷ். அவருக்கு உற்றதுணையாகவும், படத்திற்கே உறுதுணையாகவும் இருந்து அசத்தியுள்ளார் ஆனந்த்ராஜ். விடிவி கணேஷ் அல்டிமேட் ஆக்டிங். சரண்யா பொன்வண்ணன் பண்ணும் சில ரணகளம் அதகளமாக அமைந்துள்ளது. ரெஜினா கசண்டரா, நாசர் இருவரும் நம்பகத்தன்மை நிறைந்த பேயோட்டிகளாக வருவதால் பல க்ளேஷே காட்சிகள் கூட செம்மயாக வொர்க்கவுட் ஆகிவிடுகிறது

யுவனின் இசை பேயோட்டும் வேகத்தில் பரபரக்கிறது. ஒரு பாடலும் படத்திற்குள் பக்காவாக பொருந்துகிறது. க்ளைமாக்ஸ் டைமில் வரும் முத்து படத்தின் பாட்டிசை படத்தை பாசிட்டிவ் வைபில் வைக்கிறது. யுவாவின் ஒளிப்பதிவு கச்சிதமான தனிப்பதிவு. சின்ன வட்டத்திற்குள்ளே கதை சுற்றினாலும் சரியான திட்டமிடலோடு ஷாட்ஸ் வைத்து கலக்கியுள்ளார்

பேய் படங்களுக்கு என்றே அமைக்கப்பட்ட திரைக்கதை என்றாலும், ஆங்காங்கே குழந்தைகள் ரசிக்கும் படியும், பெரியவர்கள் சிரிக்கும் படியும் காட்சிகளை உருவாக்கியுள்ளார் இயக்குநர். படம் துவங்கி 15 நிமிடம் கழித்தபின் படம் முழுவதுமாக நம்மை ஆக்கிரமித்துக் கொள்கிறது. நல்ல பேமிலி எண்டர்டெய்ன்மெண்ட் படமாக மாறியுள்ள கான்ஜுரிங் கண்ணப்பன் வசூலை வாரிக்குவிக்கும் வாய்ப்புள்ளது.
பெரிய படங்களை பிரம்மாண்டமாக தயாரிக்கும் AGS நிறுவனம், இப்படியான மினிமம் பட்ஜெட்டில் வித்தியாசமான படங்களை எடுத்து ஹிட் அடிப்பது வளரும் படைப்பாளிகளுக்கு பெரிய உந்துதல்.

3.25/5
-மு.ஜெகன் கவிராஜ்