டியர்- விமர்சனம்
அன்பும், சகிப்பும், விட்டுக்கொடுத்தலும் தான் எல்லா இரவுகளையும் இனிய இரவாக மாற்றும் என்பதைச் சொல்கிறது டியர்
அதீதமாக குறட்டை விடும் பழக்கம் ஐஸ்வர்யாராஜேஷ்க்கு. சின்னச் சத்தம் எழுந்தால் கூட தூக்கத்தில் இருந்து விழித்துவிடும் பழக்கம் ஜி.வி பிரகாஷுக்கு. இருவரும் இரு வீட்டாரால் முடிவு செய்யப்பட்டு கணவன் மனைவியாகிறார்கள். மனைவியின் குறட்டை கணவனை விரட்ட, மேலும் சில எமோஷ்னல் விசயங்களும் படத்திற்குள் மிரட்ட…பக்கா கமர்சியல் பேக்கேஜாக டியர் ரெடி
பிரஷ் ஆன ஜிவி டிப்பிரஸ் ஆன ஜிவி என இரு பரிமாணம் காட்டி நடிப்பில் அசத்தியுள்ளார் ஜிவி பிரகாஷ். சற்று நேரத்திற்குள் கதைக்குள் புகுந்துவிடும் ஜிவி அக வாழ்வுக்கும் புற வாழ்வுக்கும் இடையே அல்லாடும் மனித வாழ்வை அழகாக பிரதிபலிக்கிறார். ஐஸ்வர்யா ராஜேஷ் என்றாலே நல்லா நடிப்பார் என்பது சிவாஜி நல்லா நடிப்பார் என்பது போலாகிவிட்டது. பர்ஸ்ட் ப்ரேமில் இருந்தே நாம் எங்கோ பார்த்த ஒரு பெண்ணாக மனதிற்குள் வந்துவிடுகிறார். படத்தில் பேராச்சர்யம் காட்டிய ஜோடி காளிவெங்கட், அவரது மனைவியாக வரும் நந்தினி. இருவரின் உடல்மொழியும் குரல்மொழியும் அட்டகாசம். குறிப்பாக காளிவெங்கட் காட்டும் சில வெரைட்டி பெர்பாமன்ஸ் ஆசம். அதேபோல் அவரது மனைவியாக நடித்திருக்கும் நந்தினி பிரமாதப்படுத்தியுள்ளார். இனி வரிசையாக அவரை பல படங்களில் பார்க்கலாம். அடுத்து ரோஹினி தன் கேரக்டரின் கனம் உணர்ந்து நடித்து, நம் மனம் நிறைக்கிறார். கணவனையும் விட்டுக்கொடுக்காமல், மகன்களையும் அனுசரித்து, மருமகள்களையும் அரவணைத்து அவர் வெளிப்படுத்தும் ரியாக்சன்ஸ் ஆசம் ஆசம். இளவரசு அவரின் மனைவி என படத்தில் தோன்றும் எல்லா கேரக்டர்களும் மனதில் சிறப்பாக பதிகிறார்கள்
ஜிவி எந்த இடத்தில் இசைக்க வேண்டும், எந்த இடத்தில் மெளனம் வேண்டும் என உணர்ந்து இசைத்துள்ளார். ஒளிப்பதிவாளர் இது பேமிலி ட்ராமா டயலாக் மற்றும் ஒரியண்டல் மூவி என்பதை உணர்ந்து பல Feel good ஷாட்களை வைத்து கவர்ந்துள்ளார்
சிறிய விசயங்கள் ஏற்படுத்தும் விளைவுகள் நம்மை பெரிய முடிவுகளை எடுக்க வைத்துவிடும். முடிவு எடுப்பதற்கு முன் விளைவுகளை ஒரு கணமேனும் சிந்தித்துப் பார்த்தல் அவசியம் என அகத்தில் அறைகிறது படம். ஹீரோ குடும்பத்திற்கு நேரெதிராக ஹீரோயின் குடும்பத்தை அமைத்த விதம், தானொரு மேல் சாவனிஸ்ட் என தெரியாமலே மேல் சாவனிஸ்டாக இருக்கும் காளி வெங்கட் கேரக்டருக்கு எழுதப்பட்ட ரைட்டிங் என திரைக்கதைக்காக பல இடங்களில் அட போட வைக்கிறார் இயக்குநர்
குறைகளில் நிறை காணா விட்டாலும் குறைகளை முன்வைத்து சக உயிரை குறைவாக எண்ணாதிருத்தல் பெரு வாழ்வுக்கு நலம் சேர்க்கும் எனச் சொன்ன இந்த டியருக்கு நாம் சியர்ஸ் சொல்லுவோம்
3.5/5
-மு.ஜெகன் கவிராஜ்