எக்கோ- விமர்சனம்

எதிரொலி என்ற தமிழ் வார்த்தையை ஆங்கிலப்படுத்தினால் அதுதான் எக்கோ!

செயற்கையான ஒலிகளை இயற்கை போல பாவித்து ஒரு மனிதருக்குள் வைத்து பயன்படுத்தினால் அதன் விளைவு உளவியல் ரீதியாக எப்படி இருக்கும் என்பதை ஹாரர் கலந்து பேசுகிறது எக்கோ! ஹீரோ ஸ்ரீகாந்த் தன் மனைவியோடு இல்லற வாழ்வில் நுழையும் சமயம் சில பல அதிர்ச்சிகளைச் சந்திக்கிறார். அதற்கான தீர்வைத் தேடி பேய்கள் சம்பந்தப்பட்ட ஆராய்ச்சியாளரும் ஆலோசகருமான ஆசிஸ் வித்யார்த்தியைச் சந்திக்கிறார். ஆசிஸ் வித்தியார்த்தியிடம் ஸ்ரீகாந்த் விவரிக்கும் விசயங்களும், அதற்குப் பின்னால் மறைந்துள்ள நிஜங்களும் தான் இப்படத்தின் கதை

கதாநாயகன் பிம்பத்தைத் துறந்து கதையின் நாயகனாக படமெங்கும் வலம் வருகிறார் நடிகர் ஸ்ரீகாந்த். காதலனாக, கணவனாக, யாரும் எதிர்பாராத மற்றொரு பரிமாணத்திலும் அசத்துகிறார். வித்யா ப்ரதீப், பூஜா காவேரி இருவரும் தங்களின் கேரக்டர்களை உள்வாங்கி நாயகிகளாக நல்ல நடிப்பை கொடுத்துள்ளனர். ஆசிஸ் வித்யார்த்தி தான் ஏற்றுள்ள கேரக்டருக்கு 100% நியாயம் சேர்த்துள்ளார். பேய் பற்றிய அவருடைய சயின்ஸ் கலந்த விளக்கம் அவர் கேரக்டரின் தன்மையை இன்னும் உயர்த்துகிறது. காளிவெங்கட் சிறிய வேடத்தில் வந்தாலும் அதைச் சரியாகச் செய்துள்ளார். ஸ்ரீநாத், கும்கி அஸ்வின், டெல்லி கணேஷ், ப்ரவீனா ஆகியோரும் பொறுப்பை உணர்ந்து நல்ல நடிப்பை கொடுத்துள்ளனர்.

ஹாரர் கலந்த கதை அம்சம் உள்ள படங்களுக்கு பின்னணி இசையும் ஒளிப்பதிவும் மிகவும் முக்கியம். அதை நன்றாக மனதில் ஏற்று உழைத்துள்ளனர் இசை அமைப்பாளர் நரேன் பாலகுமாரும், கேமராமேன் கோபிநாத்தும். எடிட்டர் சுதர்ஷன் படத்தை இரண்டு மணி நேரத்திற்கும் குறைவாக கட் பண்ணி ஷார்ப்பாக உழைத்துள்ளார்.

பயம் காட்டுவதை மட்டுமே நோக்கமாக கொள்ளாமல், அதற்குள் அம்மா செண்டிமெண்ட், காதலி, மனைவி செண்டிமெண்ட் ஆகிய விசயங்களையும் சேர்த்து கவனிக்க வைத்துள்ளார் இயக்குநர் நவின் கணேஷ். முன்பாதியில் இன்னும் படம் நம் கவனத்தை குவித்திருக்க வேண்டும். இயக்குநர் ரைட்டிங்கில் கவனம் எடுத்திருக்கலாம். பின்பாதியில் படம் மின்னல் என பாய்கிறது. படத்தின் இறுதியில் வரும் ட்விஸ்ட் எதிர்பாராதது.

எக்கோ சிறுசிறு எல்லைகள் வைத்தாலும் எல்லாருக்கும் பிடிக்கும் அளவில் வந்திருக்கிறது.

-மு.ஜெகன் கவிராஜ்