கூழாங்கல்- விமர்சனம்

வாழ்வில் அன்றாடம் கடந்து போகும் சிறு பகுதிகளை தொகுத்து கூழாங்கல் ஆக்கி தந்துள்ளார் இயக்குநர் வினோத் ராஜ்

மனைவியைத் தேடிச் செல்கிறார் குடிகார கணவர். அவர் தன் கூடவே தன் மகனையும் அழைத்துச் செல்கிறார். அந்த மகன் அன்னையின் அன்பைத் தேடிச் செல்கிறான். கணவனுக்குள்ளும் அன்பு இருக்கிறது. ஆனால் அதைத் தாண்டி வன்முறை நீள்கிறது. தந்தையும் மகனும் பஸ்ஸில் பயணித்து பின் காட்டு வழியே திரும்பி வரும் பயணம் தான் படம்

இதில் நடித்துள்ள ஒவ்வொரு மனிதருக்குள்ளும் இப்படத்தின் ஜீவன் ஒளிந்துள்ளது. அட்டகாசமான நடிப்பால் அனைவரும் நமக்குள் நுழைந்துவிடுகின்றனர். ஒவ்வொரு காட்சியும் உலகத்தரம். ஒவ்வொரு ப்ரேமிங்கும் பேரனுபவம்

சோனிலைவ் ஓடிடியில் வெளியாகியுள்ளது இப்படம். தியேட்டர் அனுபவம் கிட்டவில்லை என்றாலும் ஓடிடி அனுபவமும் நமக்குள் நல்ல தாக்கத்தை ஏற்படுத்துகிறது

படத்தில் கதை என்பது எதுவுமே இல்லை. படத்தின் சின்ன சின்ன நகர்வுகளுக்குள் ஆயிரம் கதையும் தத்துவமும் பொதிந்துள்ளது

பின்னணி இசையை குறைத்துக் கொண்டு படத்தின் ஜீவனுக்கு ஆதார சுருதி கொடுத்துள்ளார் யுவன் சங்கர் ராஜா. இரண்டு ஒளிப்பதிவாளர்களும் தான் படத்தின் உயிர்& மற்றும் உடல்

பொங்கிப் பெருகும் கோபத்தின் வழியே கூட சிந்திச் சிதறும் அன்பை கண்டடைய முடியும் என்பதை உணர்த்திய இந்தக் கூழாங்கல் தமிழ்சினிமாவின் வைரக்கல்
4/5
-மு.ஜெகன் கவிராஜ்