வீரசூர தீரன்- விமர்சனம்

வெகுநாட்களுக்குப் பின் விக்ரமிற்கு ஒரு மாஸ் ஹிட்

எஸ்.ஜே.சூர்யா இரண்டு பேரை என் கவுண்டர் செய்ய முடிவெடுக்கிறார். அதற்கு முன் எஸ்.ஜே சூர்யாவை விக்ரமை வைத்து வீழ்த்த திட்டமிடப்படுகிறது. அந்தத் திட்டம் கை கூடியதா? விக்ரம் எடுக்கும் நிலைப்பாட்டிற்கான பின் கதை என்ன? இருவரை என் கவுண்டர் லிஸ்டில் சேர்த்த எஸ்.ஜே சூர்யாவின் பின் கதை என்ன? அந்த இருவர் யார்? அவர்கள் மோட்டிவ் என்ன? என்பதற்கான விவரிப்பே படத்தின் திரைக்கதை

படத்தில் நிறைய சூர தீரர்கள் இருந்தாலும், ஒற்றை வீரனாய் அசத்துகிறார் நடிகர் விக்ரம். அர்ப்பணிப்பின் மறுபெயரான அவர் காட்டியிருக்கும் பெர்பாமன்ஸ் வீரதீர சூரனின் வெற்றி மகுடத்தை உறுதிப்படுத்தியுள்ளது. எஸ்.ஜே சூர்யா தனது வழக்கமான கத்தல் கதறலைக் குறைத்து வேறோர் பரிமாணத்தைத் தொட்டுள்ளார். தான் நடிக்கும் படங்களில் எல்லாம் தனித்த இடம் பிடிக்கும் துஷாரா விஜயன் இதிலும் முத்திரைப்பதித்துள்ளார். இன்னும் சிறப்பு வாய்ந்த நடிகர்கள் பலர் திரையில் கொடுத்த வேலையைச் சரியாகச் செய்துள்ளனர்.

இசையில் ஒரு தனி ஆவர்த்தனமே நடத்தியுள்ளார் ஜிவி பிரகாஷ். இரவின் அடர்த்திற்குள் இசையும் பெரும் பிரவாகமெடுத்து படத்தைக் காப்பாற்றுகிறது. தேனீஸ்வரர் தேனிக்களின் உழைப்பைப் போல் கடும் உழைப்பைச் செய்துள்ளார். ஒவ்வொரு ப்ரேமிங்கும் கன கச்சிதம். முக்கால்வாசிக்கும் மேல் இரவில் நடக்கும் காட்சிகளுக்கு அவர் கொடுத்துள்ள லைட்டிங் தரம்

வழக்கமான கதை என்று சிலர் சொல்லக்கூடும். இந்த உலகத்தில் மொத்தத்தில் சிலகதைகள் மட்டுமே உள்ளன. ஆனால் எண்ணற்ற திரைக்கதைகள் உள்ளன. சொல்லப்பட்ட கதைகளைக் கூட திரைக்கதையின் துணைகொண்டு வேறு விதத்தில் சொன்னால் அது எடுபடும். அதற்கு தமிழில் எத்தனையோ படங்கள் சாட்சியாக இருக்கின்றன. அந்த இடத்தில் இந்த வீரசூர தீரனும் இருப்பான். முதல் பாதிக்கும் இரண்டாம் பாதிக்குமான தேவையை அறிந்து, ரசிகனை மதித்து இயக்குநர் திரைக்கதையை அமைத்துள்ளார்.

வீரதீர சூரன்- வெற்றிக்காரன்
3.75/5

-வெண்பா தமிழ்