பார்ட்னர்- விமர்சனம்

ஒரு ஆண் பெண்ணாக மாறி அழிச்சாட்டியம் செய்தால் எப்படி இருக்கும்? என்ற கற்பனை படம் பார்க்கும் நம்மை நிமிர்ந்து உட்கார வைக்கிறது. ஆனால் அடுத்தடுத்த சம்பவங்கள்?

ஹீரோ ஆதிக்கு பணப்பிரச்சனை. அதற்குப் பின்னால் தங்கச்சி செண்டிமெண்ட் வேறு. அதனால் அவர் யோகிபாபுவோடு இணைந்து திருடிச் சம்பாதிக்கும் முடிவுக்கு வருகிறார்.
இன்னொரு பக்கம் இறந்தவர்களின் டி.என்.ஏவை எடுத்து நிகழ்காலத்தில் இருப்பவர்களின் உடலில் செலுத்தி இறந்தவர்களின் செயல்பாடுகளை உயிரோடு இருப்பவர்களுக்கு மடை மாற்றும் ஓர் அதிசய மருந்தை கண்டுபுடிக்கிறார் பாண்டியராஜன். அந்த மருந்தை ஆட்டையப்போடும் அசைன்மெண்டை ஜான் விஜய் யோகிபாபு ஆதி கூட்டணியிடம் கொடுக்கிறார். ஒரு குழப்பத்தில் அந்த மருந்தை யோகிபாபு அருந்த யோகிபாபு ஹன்சிகாவாக மாறுகிறார். அடுத்து என்ன? என்பதே படத்தின் கதை

ஆதிக்கு பெரும் மாற்றம் கொடுக்க கூடிய நடிப்போ ஸ்பேஸோ கதையில் இல்லை என்பதால் அவரும் ஆவ்ரேஜாகவே நடித்துள்ளார். ஹன்சிகாவிடம் பழைய துள்ளல் எனர்ஜி இல்லை. யோகிபாபு ரோபோ சங்கர் உள்ளிட்ட பலரும் சிரிக்க வைக்க முயற்சி எடுத்துள்ளனர். ஓரளவு வெற்றியும் பெற்றுள்ளனர். பலாக் லால்வாணி கொடுத்த வேலையைச் சிறப்பாகச் செய்துள்ளார்

பாடல்கள் பின்னணி இசை இரண்டுமே ஓகே ரகம். ஒளிப்பதிவாளர் கலர்புல் ஆக உழைத்துள்ளார்.

மிகவும் இண்ட்ரெஸ்டிங்கான லைன் என்பதற்காகவே இயக்குநரைப் பாராட்டலாம். முழுமையான திரைக்கதை வடிவத்தை எழுதாமல் வெறும் காமெடி காட்சிகளை வைத்து மட்டுமே படத்தைத் தேற்ற நினைத்துள்ளார் இயக்குநர். ஒருசில இடங்களில் அந்தக் காமெடிக் காட்சிகள் கை கொடுப்பதையும் மறுப்பதிற்கில்லை. இன்னும் ஸ்ட்ராங்காக திரைக்கதையில் எபெக்ட் போட்டிருந்தால் இப்போது தூரத்தில் நிற்கும் பார்ட்னர் நம் தோளில் கை போட்டிருப்பார்
2.75/5